प्रहरी महानिरीक्षक नियुक्तिबिरुद्ध परेको रिटमाथि आज सुनुवाई, फैसलाको सम्भावना भने न्यून

३१ असार, काठमाडौं ।  सरकारले वरिष्ठलाई छाडेर कनिष्ठलाई नेपाल प्रहरीको महानिरीक्षक नियुक्ति गरेको भन्दै त्यसविरुद्ध परेको रिटमाथि आज पनि सुनुवाइ हुँदैछ । उक्त मुद्दा अहिले सर्वोच्च अदालतमा विचाराधीन जस्तैछ ।

नेपाल प्रहरीको आईजीपी नियुक्तिविरुद्धको मुद्दाको सुनुवाई आज भएपनि आजै फैसला आउने सम्भावना भने नरहेको बताइएको छ । कामु प्रधानन्यायाधीश दीपककुमार कार्की र कुमार चुडालको संयुक्त इजलाशमा सुनुवाइ भइरहेको उक्त मुद्दाको पेसी पटकपटक हेर्दाहेर्दैमा राखेर सारिँदै आइएको छ ।

आज रिट निवेदक तर्फबाट जवाफी बहस सकिएपश्चात सर्वोच्चले फैसलाको प्रक्रिया थाल्नेछ । एआईजी विश्वराज पोखरेलले आफूभन्दा १७ महिना जुनियरलाई आईजीपी बनाएको भन्दै गत वैशाख १९ गते सर्वोच्च अदालतमा रिट दर्ता गरेका थिए ।

एआईजी बढुवा सिफारिसविरुद्ध परेको रिटमा पोखरेलको रिटलाई ‘लगाउ’ राखेपछि जेठ ३० गतेबाट अन्तिम सुनुवाइ सुरू भएको थियो । सरकारले ज्येष्ठता तथा बरीयता मिचेर आईजीपीमा बढुवा गरेको भन्दै एआईजी पोखरेलले सर्वोच्चमा सो निर्णय बदर हुनुपर्ने माग रिटमा गरेका छन् ।

पोखरेलले रिटमा प्रधानमन्त्री तथा मन्त्रिपरिषद्को कार्यालय, गृह मन्त्रालय, नेपाल प्रहरी प्रधान कार्यालय र नवनियुक्त महानिरीक्षक सिंहलाई विपक्षी बनाएका छन् । उनले सरकारको निर्णय कार्यान्वयन नगर्न नगराउन अन्तरिम आदेश माग गरेका छन् ।