गुप्तचरको एआईजीमा थापा

३१ असार, काठमाडौं । सरकारले राष्ट्रिय अनुसन्धान विभागमा रिक्त रहेको अतिरिक्त मुख्य अनुसन्धान निर्देशक पदमा कुलदेव थापालाई बढुवा गरेको छ । शुक्रबार बसेकोे मन्त्रिपरिषद् बैठकले थापालाई मुलुकको गुप्तचरी निकाय राअविको दोस्रो वरियताको पद अतिरिक्त मुख्य अनुसन्धान निर्देशकमा बढुवा गरेको हो ।

थापा हाल गुप्तचरका लागि गण्डकी प्रदेश प्रमुखका रुपमा कार्यरत थिए । एआईजी सरहको अतिरिक्त मुख्य अनुसन्धान निर्देशक पदका लागि अनुसन्धान निर्देशक हुतराज थापा, हरिहर पौडेल, ओम जोशी र सुनिल ढकाल प्रतिष्पर्धामा थिए । उनीहरु १४ भदौ २०७४ मा अनुसन्धान निर्देशक पदमा बढुवा भएका थिए ।

सरकारले दोस्रो नम्बर वरियतामा रहेका थापालाई अतिरिक्त मुख्य अनुसन्धान निर्देशकमा बढुवा गरेपनि उनी ५८ वर्षे उमेर हदका कारण साउन ४ गते अवकाशमा जाँदैछन् । राअविका हालका मुख्य अनुसन्धान निर्देशक यदुलाल खरेलले २३ भदौबाट अवकाश पाउँदैछन् ।