‘मिटु’को अभियोग लागेका भुवन केसी चलचित्र विकास बोर्डको अध्यक्षमा कति उपयुक्त ?

३ साउन, काठमाडौं । सञ्चार तथा सूचना प्रविधि मन्त्रालय अन्तर्गत रहेको नेपाल चलचित्र विकास बोर्डको अध्यक्षका लागि आवेदन दिने उमेदवारको अन्तर्वार्ताको मिति तोकिएको छ । मन्त्रालयले सूचना जारी गर्दै अन्तर्वार्ताको मिति साउन ५ देखि ७ तोकेर समय पनि निर्धारण गरेको छ ।

चलचित्र विकास बोर्डको अध्यक्षको सिट खाली भएर दस जना नेपाली चलचित्र क्षेत्रका ब्यतित्वहरुले आवेदन फारम बुझाएका छन् । राजनीतिक नियुक्ति समेत भएकोले सबैजना आ–आफ्नो हिसाबले दौडधुपमा व्यस्त छन् । सम्भवत अर्को सातासम्म चलचित्र विकास बोर्डको अध्यक्ष नियुक्त भैसकेको हुनेछ ।

चलचित्र विकास बोर्डको भावी अध्यक्षको रुपमा सबैभन्दा प्रवल दावेदारको रुपमा चर्चित नायक भुवन केसीको अहिले व्यापक चर्चा छ । केहि समय अघि मात्र बरिष्ट कलाकार निर शाहको पहलमा उनि नेपाली कांग्रेश प्रवेश गरेका थिए । उनको पार्टी प्रवेशलाई त्यसबेला नै विकास बोर्डको नियुक्तिसँग जोडिएको थियो । जुन कुरा अहिले आएर सत्य साबित भैसकेको छ ।

यस अघि पनि चलचित्र विकास बोर्डको अध्यक्षको पदको लागि एमाले प्रवेश गरेका केसी अहिले आएर कांग्रेश प्रवेश गर्नु र अहिलेको उनको भित्रि दौडधुप्ले प्रस्ट हुन्छ । उनि अहिले प्रधानमन्त्री देखि उनको आसपासका सम्पूर्ण व्यक्तिहरुको सम्पर्कमा दिनरात हुन्छन ।

भुवन केसीले आफ्नो करिअरमा धेरै सफल फिल्म दिएका पनि छन् । सम्झना, मायालु ,कुसुमे रुमाल, चिनो, दुई थोपा आँसु, करोडपति,सुपरस्टार उनका सफल फिल्मका सूची हुन्, जहाँ उनले उल्लेखनीय अभिनय गरेका छन् र गुड लुकिङ’ भुवनले आफूलाई रोमान्टिक हिरोको रूपमा स्थापित समेत गरेका छन् । तर आफ्नो स्टारडमको युगमा होस या आफ्नो छोरा अनमोलको स्टारडमको युगमाहोस् उनि जहिले विवाद र बिभिन्न काण्डमा फसिरहने व्यक्तित्व हुन् भन्ने कुरामा कुनै दुई मत नहोला । भुवनका सार्वजनिक केहि किस्साहरु यस्ता छन् ।

२ बर्ष अघि क्यानाडाबाट सामाजिक सञ्जालमा शेयर गर्दै श्रीमती (नाम गोप्य राखिएको ) रेग्मीले भुवनको विरुद्ध ‘मिटु’ अभियान चलाइन् । फेसबुक भिडियोमा आफैले बोलेर केसीको बदनियत र दुव्र्यवहारबारे खुलेरै अघि आइन् ती रेग्मी थरकी महिला । अहिलेपनि त्यो भिडियो डिजिटल प्लेटफर्ममा हेर्न सकिन्छ । उनले आफ्नो भिडियो र भुवनसंँग भएको मेसेन्जर वार्ता त्यतिखेर सार्वजनिक गरिन् जतिबेला भुवनलाई उनैले आफ्नो छोराको लागि निर्माण गरेको पहिलो चलचित्रकी शाह थरकी नायिकाले ‘ह्यारासमेन्ट’को अभियोग खुलेआम लगाएकी थिइन् ।

यस्मा भुवनलाई कारवाहीको दायरामा ल्याउन थप बल पुगोस् भनी रेग्मीले क्यानाडाबाट आफु खुलेको अनुमान गर्न सकिन्छ । शुरुमा छद्म रुपमा अन्तर्वार्तामा नायिका शाहले कुरा चुहाएको भएपनि चोरको खुट्टा काट् भन्दा चोरले खुट्टा पछि सारेझैंं भुवनले सामाजिक संजालमा स्ट्याटस् युध्द गरेपछि कुरा सतहमा आएको थियो । नायिकाले यति मात्र बोलिनन्, त्यसपछि पनि आफूमाथि भुवनले गरेको दुव्र्यवहारबारे पनि बोलिन् । जापानमा भएको अवार्ड कार्यक्रममा भुवन आफूसँग टाँसिन आएको पनि आरोप लगाइन् । उनले भनेकी छिन्, ’उहाँले गालामा मुख जोडाएर छोरी, अब यस्तो नगर है भन्नुभयो । तैपनि मैले सुनिरहेँ ।’

पछि भुवन र नायिका दुवैले कानुनी बाटो रोजे । दुवैले जिल्ला अदालत काठमाडौंमा अलगअलग मुद्दा दर्ता गराएका छन् । मुद्दा अझै विचाराधीन अवस्थामै छ । भुवन करिअरको उतरार्धमा रहँदा एक विवाहित युवतीको प्रेममा थिए । बुटिक सञ्चालन गर्ने ती युवती र भुवन सार्वजनिक कार्यक्रममा पनि सँगै देखिन्थे । उनीहरूको प्रेमचर्चाले फिल्मक्षेत्रलाई तताएको थियो । भलै, उनीहरूले आफ्नो प्रेमलाई स्वीकारेका थिएनन् । तर त्यो ओपन सेक्रेट थियो ।

तीनै युवतीसँग गाडी चढेर नगरकोट डेटिगं हिँडेका भुवनलाई कोटेश्वरमा ती युवतीका श्रीमानले कुरेर हेलमेटले कुटेको खबर खुबै भाइरल भएको थियो । भुवनले त्यसबेला कोटेश्वरमा बाटो छेकेको कुरालाई स्वीकार्छन् । तर, कुटाइ खाएको कुरालाई स्वीकारेनन् । तर प्रत्यक्षदर्शी र ट्राफिक प्रहरीले उक्त हेल्मेट काण्डलाई पुष्टि गरेका थिए ।

अभिनेत्री सारंगा श्रेष्ठले कुनै बेला भनेकी थिइन्, ’यदि भुवन केसी फिल्मक्षेत्रमा थिएनन् भने धेरै अभिनेत्रीहरू कुमारी नै हुन्थे ।’ सारंगाको उक्त अभिव्यक्ति फिल्मक्षेत्रमा लामो समय गसिपको विषय बन्यो । मिडियाले पनि भुवनलाई प्रश्न सोध्न थाले, ’के तपाईं स्त्रीलम्पट हो ?’

यो प्रश्न त भुवनलाई अहिलेसम्म पनि सोधिन्छ । जवाफमा उनले आपत्तिजनक किसिमको टिप्पणी गर्ने गरेका छन्, ’हेन्डसम छु, केटीहरू पछि लाग्छन् त मेरो के दोष ?’ तर यतिमात्र होइन एउटा पुरानो चर्चित प्रसगं पनि छ ।
नारायण पुरीको निर्देशन रहेको फिल्म ’महादेबी ’को छायांकन को क्रममा एक दृश्यमा भुवनले करिश्मालाई चुम्बन गर्नुपर्ने थियो । पोखरामा भएको सो शुटिगंमा धेरै टेक लिइसक्दा पनि निर्देशकले चित्त बुझाएनन् ।

भुवनले नियोजित रूपमा नै टेक बिगारेको आरोप लाग्यो । अन्ततः करिश्माले छायांकनस्थलबाटै पति विनादलाई फोन गरेर बोलाएपछि भोलिपल्ट बिनोद मानन्धरले निर्देशक पुरीलाई आवेशमा हातै हालेका थिए । भुवनले यो टेक बारम्बार लिनलाई निर्देशकलाई प्रभाव पारेर गर्न लगाएको र पहिलो फिल्म निर्देशन गर्दै गरेका नारायणले भुवनको कुरा मानेको पाइयो ।

फेरि चर्चा चल्यो अभिनेत्री जिया केसीसँग । भुवन र जिया लिभ–इन टुगेदरमा लामो समय बसेका छन् । लामो समयदेखि उनीहरू एकसाथ बस्दै आएका छन् । तर, उनीहरूले औपचारिक रूपमा आफ्नो सम्बन्ध खुलाएका छैनन् । अभिनेत्री सुस्मिता केसीसँगको वैवाहिक सम्बन्धलाई टुंग्याएका भुवनले अहिले जियाको साथ पाइरहेका छन् ।

सुस्मिता बमजन (केसी) सँग भुवनले प्रेमविवाह गरेका थिए । तर, सुस्मिता भुवनकी पहिलो श्रीमती भने होइनन् । भुवनले सुस्मितालाई दोस्रो श्रीमतीका रूपमा भित्राएका थिए । भुवनकी पहिलो श्रीमती विजया केसी एक छोरा र एक छोरीका साथ अमेरिकामा बस्छिन् । यता सुस्मितातर्फका छोरा अनमोल केसी नेपाली फिल्मक्षेत्रमा छन् ।

यी त भुवनका चर्चित बनेका लफडा हुन् । यीबाहेक सुटिङ सेटमा प्रोडक्सन म्यानेजरलाई हातपात गरेकोदेखि होटलको बिल नतिरेकोसम्म थुप्रै किस्सा भुवनको नाममा छन् । खोजतलास गर्ने हो भने, लफडाको महाभारत नै बन्नसक्छ भुवन केसीको ।

नायिका तथा महिलाहरुसंग बारम्बार ‘मिटु’को अभियोग लागेका केसीले चलचित्र जगतको उच्च स्थानमा के आधारमा दावी गरेका हुन् ? अचम्म छ ! । काण्डैकाण्डको सुत्रधार यी नायकलाई चलचित्र विकास बोर्डको अध्यक्षजस्तो गरिमामय पदमा राख्दा त्यो पदको गरिमा कति घट्ने हो त्यो भने सम्बन्धित पक्षले बेलैमा विचार पुर्याउंदा राम्रो ।