एन्फा कार्यसमितिकाे बैठक दुईपटक नै स्थगित

५ साउन , काठमाडौं  ।  पंकजबिक्रम नेम्बाङ अखिल नेपाल फुटबल संघ (एन्फा) को अध्यक्षमा निर्वाचित भएपछिकाे दोस्रो बैठक सुरु नहुँदै स्थगित भएकाे छ। अध्यक्ष नेम्वाङ बैठकको बीचमा नै उठेर हिँडेपछि सो बैठक स्थगित भएको हाे ।

अध्यक्ष कार्यक्रमको बीचैबाट उठेर हिँडेपछि आजकाे  कार्यक्रम स्थगित भएको जनाइएको छ । सातदोबाटोस्थित एन्फा मुख्यालयमा बिहान सात बजेलाई बैठक बोलाएपनि ढिला गरि ८:३० मा मात्रै सुरु भएको थियो ।  गत सोमबार बैठक बोलाइएपनि अन्तिम समयमा अध्यक्ष नेम्बाङ अस्वस्थ भएपछि बैठक स्थगित भएको थियो ।

बैठकमा विविधसहित १२ बुदामा एजेन्डा राखिएको छ । जसमा विवादित नेपाल सुपर लिग (एनएसएल) देखि विभिन्न पदाधिकारी नियुक्ति, नेपालमा हुने महिला साफ च्याम्पियनसिप मुख्य एजेन्डा रहेको छ ।

पछिलो समय पदाधिकारी नियुक्तिमा भने निकै पेचिलो बनेको छ । कर्मा छिरिङ शेर्पालाई पराजित गर्दै एन्फा हाक्न आएका पंकज आज निकै दवावमा परेका छन् ।

तीन समूहलाई समेटेर नियुक्ति नै कठिन रहेको छ । सीईओ, प्रवक्ता, उपमहासचिव, तीन सहमहासचिव, मानार्थ अध्यक्षसहित विभिन्न पदमा आज नियुक्ति  गर्ने एजेण्डा थियाे ।