यसरी जाँदैछ नेपालको अर्थतन्त्रमा डरलाग्दो पहिरो

१ भदौ, काठमाडौं । मुलुकको आयातले कुनैपनि देशको समग्र अर्थतन्त्र कुन दिशामा गईरहेको छ भन्ने संकेत गर्दछ । नेपाल राष्ट्र बैंकले हालै प्रकाशित गरेको आर्थिक वर्ष २०७८.७९ को वार्षिक तथ्यांङकले नेपालको अर्थतन्त्र पातालतर्फ धसिंदैछ भन्ने एउटा गम्भीर संकेत गरेको छ ।

नेपाल राष्ट्र बैंकले प्रकाशित गर्दै आएको ब्रोड इकोनोमिक क्लासिफिकेशनले नेपालको सम्पूर्ण आयातलाई तीन भागमा बाँडी आयात कुन कार्यका लागि भईरहेको छ भन्ने तथ्यांङक प्रकाशित गर्दै आएको छ ।

आर्थिक वर्ष २०२०.२१ मा औद्योगिक कच्चापदार्थ ( वर्गीकरणको भाषामा इन्टरमिडियट कन्जम्सन)को आयात नेपालको कुल आयातको ५३.४ रहेको थियो ।

तर सो आँकडामा आर्थिक वर्ष २०२१.२२ मा त्यसमा ह्रास आई ५२ प्रतिशतमा झरेको छ । यसैगरी पुँजी निर्माणमा उपयोग हुने मशिनरी लगायतको आयात आर्थिक वर्ष २०२०.२१ मा कुल आयातको १२.१ प्रतिशत रहेकोमा सो आयात आर्थिक वर्ष २०२१.२२ मा १०.१ प्रतिशतमा झरेको छ ।

यो आँकडाले नेपालमा औद्योगिक क्रियाकलापहरु सुस्त हुँदै गएको र यही प्रवृत्ति कायम रहेमा भविष्यमा अर्थतन्त्र गहिरो खाडलतर्फ धकेलिने संकेत गरेको छ । उता मुलुकको कुल आयातमा अन्तिम उपभोगको हिस्सामा भारी वृद्धि भएको छ ।

आर्थिक वर्ष २०२०।२१ मा अन्तिम उपभोग्य वस्तुहरुको आयातको हिस्सा कुल आयातमा ३४.५ प्रतिशत रहेकोमा आर्थिक वर्ष २०२१।२२ मा ३७.९ प्रतिशत पुगेको छ । यो आँकडाले विदेशबाट तयारी मालवस्तुको आयात बढिरहेको, औद्योगिक कच्चापदार्थ तथा मशिनरीको आयात घटिरहेको देखिन्छ ।