वालिङ क्याम्पसको वेथिति छताछुल्ल, दोहोरो सुविधा लिने यी हुन् ११ प्राध्यापक, क्याम्पसमा आर्थिक संकट

♦प्रदीप कोइराला

२ भदौ, स्याङ्जा । शिक्षा नियमावलीको धज्जी उडाउँदै स्याङ्जा जिल्लाकै पुरानो वालिङ बहुमुखी क्याम्पसमा अध्यापन गर्ने प्राध्यापकहरुले पहुँच र पदको दुरूपयोग गरेर एकै समयमा दुई संस्थामा त्यो पनि पूर्ण दरबन्दीमा रहेर दोहोरो सुविधा खाएको विषय यतिबेला वालिङमा चर्चाको विषय बनेको छ ।

सरकारी र अर्ध सरकारी संस्थाहरूमा पूर्णरूपमा दरबन्दीमा रहेर एकै समयमा दुई संस्थामा नियुक्ति लिएर दोहोरो सुविधा लिने प्राध्यापकलाई हटाउन सञ्चालक समितिमा विषय प्रवेश भएको थियो । सोही विषयलाई लिएर एकजना संचालक समितिका सदस्यले आफ्नो सामाजिक संजालमा क्याम्पसको वेथिती र आर्थिक संकट आइपर्नुमा दोहोरो सुविधा प्रमुख कारण रहेको उल्लेख गरेका थिए ।

शिक्षा नियमावलीमा दोहोरो सुविधा लिन नपाइने उल्लेख छ । नियमावली विपरित वालिङ क्याम्पसका ११ जना प्राध्यापकले दोहोरो सुविधा लिने गरेका छन् । दोहोरो सुविधा मात्र होइन दशैं भत्तावापतको रकम पनि दुबै संस्थाबाट लिने गरेको तथ्य खुलेको छ ।

दोहोरो सुविधा लिने प्राध्यापकहरुमा यामवहादुर कुँवर, छविलाल अर्याल, तेजवहादुर आले, तोयानाथ कोइराला, गोपालधन सुवेदी, पदमपानी काफ्ले, विनोद खनाल, अमृत खनाल, टोलप्रसाद लुईटेल, खेमराज देवकोटा, चिरञ्जीवी अर्याल लगायत छन् । उनीहरु सबै सरकारी विद्यालयका प्रधानाध्याकदेखि स्थायी शिक्षक हुन् । एकजना देवकोटा स्वास्थ्य संस्थामा कार्यरत स्वास्थ्यकर्मी हुन् ।

लामो समयसम्म कोभीडको कारण क्याम्पस बन्द भएको, अनावश्यक आर्थिक भारका कारण यतिबेला वालिङ क्याम्पस झण्डै साढे दुई करोड घाटामा रहेको छ । क्याम्पसको यथार्थ संचालन घाटा र दोहोरो सुविधावापत प्राध्यापकहरुले खाइपाइ आएको सुविधा समेत हामीले क्याम्पस प्रशासनसँग माग गरेर उनीहरुको फोटो र कार्यरत विद्यालयको विवरणसहित सार्वजनिक गर्ने छौ ।

क्याम्पस भित्र राजनीतिक आडमा यी प्राध्यापकहरुले दोहोरो सुविधा लिने गरेको आरोप विद्यार्थीहरुले लगाएका छन् । दोहोरो सुविधाको विषयमा विगतमा पनि कुरा उठेपनि राजनीतिक संरक्षणकै आडमा प्राध्यापकहरुको हालीमुहाली यथावत रहेको उनीहरुको भनाइ छ । दोहोरो सुविधा लिने प्राध्यापक नहटाउँदासम्म क्याम्पसको आर्थिक र शैक्षिक सुधान नहुने उनीहरुको दावी छ ।

क्याम्पस सञ्चालक समितिका सदस्य प्रकाश अर्यालले आफ्नो सामाजिक संजाल फेसवुकमा वालिङ क्याम्पसको विषयमा यसरी आफ्नो धारणा राखेका थिए ।