राष्ट्रपतिको भूमिकामाथि देउवा र ओलीको फरक मत, दुई विधेयक अघि बढाउने विषयमा भएन सहमति

८ भदौ, काठमाडौं । राष्ट्रपति विद्यादेवी भण्डारीले नागरिकता विधेयक पुनःविचारका लागि फिर्ता पठाएको विषयमा प्रधानमन्त्री शेरबहादुर देउवा र नेकपा एमालेका अध्यक्ष केपी शर्मा ओलीबीच मत बाझिएको छ । विपक्षी दलका नेताले असहमति जनाएपछि टीआरसी र नागरिकता सम्बन्धमा तयार भएका दुई विधेयक अगाडी बढ्नेमा संका उब्जिएको छ ।

बुधबार बिहान बालुवाटारमा भएको देउवा–ओली भेटवार्ताका क्रममा उनले संविधानअनुसार नै राष्ट्रपति विद्यादेवी भण्डारीले नागरिकता विधेयक पुनर्विचार गर्न फिर्ता पठाएको जिकिर गरेका छन् । अध्यक्ष ओलीले प्रधानमन्त्री शेरबहादुर देउवालाई नागरिकता विधेयकका सम्बन्धमा जिम्मेवारीपूर्वक अघि बढ्न पनि आग्रह गरेका छन् ।

उनले अहिले आएर संसद् सकिने बेलामा टीआरसी विधेयक ल्याउनु गलत भएपनि विधेयक अगाडि बढाउने, टीआरसीलाई टुंगोमा पुर्याउने कुरामा एमालेको सहयोग रहने बताए । ओलीले गठबन्धन सरकारले पीडितहरूलाई यातना दिइरहेको समेत जिकिर गरे ।

उनले भने,‘त्यो अन्तर्राष्ट्रिय कमिटमेन्ट, सर्वोच्च अदालतको फैसला र पीडितहरू छन्, यता दुवै पक्षद्वारा पीडित सुरक्षाका परिवार छन् । माओवादीद्वारा पीडित छन् । सरकारद्वारा पीडित छन् । त्यसमा मुख्य पक्ष भनेको तपाईं हो । हामी सहयोग गर्न तयार छौँ । त्यहीअनुसारको व्यवहार हुनुपर्याे । अहिले पीडितहरूमाथि लाठी प्रहार गरिरहनुभएको छ । यातना दिइरहनुभएको छ । संसद्ले यी कुराहरूमा ध्यान दिएर टुंगोमा पुर्याउनुपर्छ ।’

ओलीले विधेयक फिर्तापछि सत्ता गठबन्धनले गरेको निर्णयप्रति असन्तुष्टि समेत जनाए । एमाले उपाध्यक्ष सुवास नेम्वाङका अनुसार ओलीले संसद्मा छलफल गर्नुपर्ने विषयमा बालुवाटारमा बसेर छलफल गर्नु गलत भएको बताएका थिए ।

‘नागरिकतासम्बन्धी विधेयकमा हामीले छलफल ग¥यौँ । पछि संसद्ले पास गर्याे । राष्ट्रपतिजीले आफ्नो चिन्ता र सरोकार देखाएर त्यसलाई पुनर्विचार गर भन्नुभयो । त्यो संविधानबमोजिम राष्ट्रपतिको कदम थियो । त्यो राष्ट्रपतिको कुरा हो । त्यसलाई त त्यहीअनुरूप लिनुपर्छ । सत्ता गठबन्धनको त्यो देखिएन । नेताहरूले सार्वजनिक रूपमा भाषण गर्नुभयो, ओलीले भनेका थिए ।,

यता, प्रधानमन्त्री शेरबहादुर देउवाले भने मंसिर ४ गते हुने प्रतिनिधिसभा र प्रदेश सभा सदस्यको निर्वाचन शान्तिपूर्ण र भयरहित वातावरणमा सम्पन्न गर्न सरकार प्रतिबद्ध रहेको बताएका थिए । देउवाले चुनावको वातावरणलाई लिएर शंका नगर्न र त्यसबारे भ्रम सिर्जना नगर्न आग्रह गर्दै निर्वाचन शान्तिपूर्ण र भयरहित वातावरणमा सम्पन्न गर्न सरकार प्रतिबद्ध रहेको बताएका थिए ।

एमाले अध्यक्ष ओलीले निर्वाचन निष्पक्ष, धाँधलीरहित र विश्वसनीय हुनु पर्नेमा सरकारको ध्यानाकर्षण गराएका थिए । जवाफमा प्रधानमन्त्री देउवाले चुनावको वातावरणलाई लिएर शंका नगर्न र त्यसबारे भ्रम सिर्जना नगर्न आग्रह गरेका थिए ।
प्रधानमन्त्री देउवाले ती विषय सत्ता गठबन्धनमा समेत राख्ने भन्दै सरकारले गम्भीर रुपमा लिएर अघि बढ्ने बताएका थिए । देउवा–ओलीबीच करिब दुई घण्टा छलफल भएको थियो । भेटमा एमाले अध्यक्ष ओलीले सरकारले संसद्मा अघि बढाएको नागरिकता विधेयक, संक्रमणकालीन न्यायसम्बन्धी विधेयकका विषयमा समेत धारणा राखेका थिए । त्यस्तै, बजारमा बढ्दो महँगी नियन्त्रणमा समेत सरकारले भूमिका खेल्न नसकेको भन्दै ध्यानाकर्षण गराएका थिए ।

भेटमा एमाले उपाध्यक्ष सुवास नेम्वाङ र विष्णु पौडेल तथा सञ्चारमन्त्री ज्ञानेन्द्रबहादुर कार्कीसमेत सहभागी थिए । सरकारले चुनावको मिति घोषणा गर्नेबेला परामर्श नलिएको गुनासो गर्दै आएको एमालेसँग प्रधानमन्त्री देउवाले मिति नजिकिँदै जाँदा त्यसबारे छलफल गरेका हुन् ।

सत्ता गठबन्धन दलबीच सिट बाँडफाँटको निष्कर्ष ननिस्किएका बेला देउवा–ओलीबीचको भेटलाई अर्थपूर्ण रुपमा हेरिएको छ । गठबन्धनको सिट बाँडफाँटसम्बन्धी बैठक बुधबारै साँझ ५ बजे पुनः बस्दैछ । देउवाको निमन्त्रणामा ओली प्रधानमन्त्रीको सरकारी निवास बालुवाटारमा पुगेका थिए । – तस्वीर ओलीको सचिवालय