अनुसन्धान प्रभावकारी बनाउन २५ हजार सीसीटीभी थप्नुपर्छः प्रहरी महानिरीक्षक

८ भदौ, काठमाडौं । प्रहरी महानिरीक्षक धीरजप्रताप सिंहले उपत्यकामा बढ्दो अपराध नियन्त्रण गर्न धेरै खालका प्राविधिक समस्याहरु भोग्न प्रहरी संगठन बाध्य भएको बताएका छन् । उनले काठमाडौं उपत्यकामा मात्रै २५ हजार सीसीटीभी थप्न आवश्यक रहेको बताएका छन् ।

प्रहरी प्रशिक्षण प्रतिष्ठानमा बुधवार आयोजित उपत्यका स्तरीय अपराध अनुसन्धान समीक्षा गोष्ठीमा बोल्दै आइजीपी सिंहले अहिले उपत्यका प्रहरी कार्यालय मातहत ५ हजार मात्र सीसीटीभी रहेको र अपराध अनुसन्धान गर्न त्यो अपुग भएको बताए ।

अपराध अनुसन्धानलाई प्रभावकारी बनाउन उपत्यकामा २५ हजार क्लोज सर्किट टेलिभिजन (सीसीटीभी) थप्नुपर्ने आइजीपी सिंहले बताए । आर्थिक अपराध र साइबरसँग सम्बन्धित अपराध बढेको जानकारी दिँदै प्रहरी प्रमुख सिंहले साइबर सम्बन्धी मुद्दा काठमाडौंको अदालतमा मात्र सुनुवाई हुने हुनाले पीडित मर्कामा परेको दावी गरे ।

उनले दार्चुला र ताप्लेजुङमा साइबरबाट पीडित भएकाहरु पनि न्यायिक प्रक्रियामा काठमाडौं आउनुपर्ने हुनाले समस्या सिर्जना भएको भन्दै वटै जिल्ला अदालतमा साइबर अपराध विरुद्धको मुद्दा दर्ता गर्नेगरी ऐन संशोधन गरिनुपर्ने बताए ।

अनुसन्धान अधिकृतहरु आफ्नो अधिकार प्रयोग गर्न हिच्किचाउन पर्ने र जाहेरी आउनासाथ आरोपी पक्राउ गर्नुपर्ने बाध्यात्मक अवस्थामा रहेको आइजीपी सिंहले बताए । उनले निर्धक्क र निर्भय भएर अनुसन्धान गर्न निर्देशन दिँदै जनतालाई न्याय दिनका लागि आफ्नो अधिकार प्रयोग गर्न हिच्किचाउन नहुने बताए ।