एक खर्ब ४६ अर्बको व्यापार गर्दा ८४ देशसँग घाटा, १७ देशसँग नाफा

१० भदौ, काठमाडौं । चालु आर्थिक वर्षको पहिलो साउनमा नेपालको कुल वैदेशिक व्यापार १ खर्ब ४६ अर्ब ९ करोड ५७ लाख ६६ हजार रुपैयाँ रहेको छ । कुल वैदेशिक व्यापारमध्यो नेपालले १ खर्ब ३१ अर्ब २८ करोड ६० लाख ६६ हजार रुपैयाँको आयात र १४ अर्ब ८० करोड ९७ लाख रुपैयाँको निर्यात गरेको छ ।

भन्सार विभागका अनुसार नेपालको सबैभन्दा ठूलो व्यापार घाटा रहेका १० देशमा भारत, चीन, इन्डोनेसिया, अर्जेन्टिना, बेल्जियम, युनाइटेड अरब इमिरेट्स (युएई), ओमान, अष्ट्रेलिया, भियतनाम र सिंगापुर रहेका छन् । भारतसँग नेपालको व्यापार घाटा ६७ अर्ब ९४ करोड ७ लाख ३४ हजार रुपैयाँ रहेको छ । चीनसँग १८ अर्ब ७० करोड २६ लाख ८७ हजार रुपैयाँ व्यापार घाटा रहेको विभागले जनाएको छ ।

विभागको तथ्याङ्क अनुसार गत साउन महिनामा इन्डोनेसियासँग ४ अर्ब ९४ करोड ८६ लाख ५७ हजार रुपैयाँ, अर्जेन्टिनासँग ४ अर्ब २१ करोड ६ लाख ४३ हजार रुपैयाँ, बेल्यिमसँग २ अर्ब ६७ करोड २८ लाख ३४ हजार रुपैयाँ र युएईसँग २ अर्ब ५० करोड ४६ लाख ९ हजार रुपैयाँ व्यापार घाटा रहेको छ ।

यस्तै, ओमानसँग २ अर्ब ९ करोड ९६ लाख २३ हजार रुपैयाँ, अष्ट्रेलियासँग १ अर्ब ४१ करोड २६ लाख ४२ हजार रुपैयाँ, भियतनामसँग १ अर्ब २१ करोड ६ लाख २० हजार रुपैयाँ र सिंगापुरसँग ९३ करोड १३ लाख २ हजार रुपैयाँ व्यापार घाटा रहेको विभागले जनाएको छ ।

चालु आर्थिक वर्ष २०७९÷८० को पहिलो महिना साउनमा नेपालले विश्वका १०१ देशसँग वैदेशिक व्यापार गरेको छ । वैदेशिक व्यापार रहेका १०१ देशमध्ये मात्र १७ वटासँग नेपालको व्यापार नाफामा रहेको छ । बाँकी ८४ देशसँग नेपालको वैदेशिक व्यापार घाटामा रहेको छ ।

भन्सार विभागका अनुसार नेपालको वैदेशिक व्यापार घाटामा रहेका देशमा भारत, चीन, इन्डोनेसिया, अर्जेन्टिना, बेल्जियम, युनाइटेड अरब इमिरेट्स, ओमान, अष्ट्रेलिया, भियतनाम, सिंगापुर, अमेरिका, युक्रेन, ब्राजिल, थाइल्याण्ड, मलेसिया, साउदी अरेबिया, दक्षिण कोरिया, बंगलादेश, कतार, टर्की, इटाली र पोल्याण्ड रहेका छन् ।

यस्तै, क्यानडा, फ्रान्स, दक्षिण अफ्रिका, नेदरल्याण्ड्स, भुटान, पराग्वे, तान्जानिया, फिलिपिन्स, मोजाम्बीक, मेक्सिको, जापान, इजरायल, न्युजल्याण्ड, बेलायत, इथियोपिया, पाकिस्तान, आइसल्याण्ड, चिली, म्यानमार, स्पेन, ग्वाटेमाला, लिथुवानिया, नाइजेरिया, इजिप्ट, चेक रिपब्लिक, फिनल्याण्ड, ग्रिस, जर्मनी, गाबोन, युगाण्डा, केन्या, कुवेत, बुल्गेरिया, डोमेनिकन रिपब्लिक, माडागास्कर, सर्विया र भेनेजुयलासँग पनि नेपालको व्यापार घाटा रहेको छ ।

श्रीलंका, हंगेरी, कजाकास्तान, कोस्टारिका, पेरु, रोमानिया, स्वाजील्याण्ड, पपुगा न्युगिनी, बहराइन, यमन, स्लोभाकिया, इरान, नामिबिया, सर्विया, सिरिया लियोन, रुस, मोरक्को, जोर्डन र जमैकासँग पनि नेपालको व्यापार घाटामा रहेको विभागले जनाएको छ ।

नेपालको व्यापार नाफा रहेका देशमा बोलिभिया, माली, अंगोला, मंगोलिया, पोर्चुगल, क्रोयसिया, न्यु क्यालेडोनिया, लेबनान, लाट्भीया, मौरिसस्, स्लोभेनिया, अष्ट्रिया, स्वीडेन, नर्वे, कम्बोडिया र डेनमार्क रहेका छन् ।