महोत्तरीमा सेमिनारको नाममा अभिभावक र विद्यार्थीमाथि दुर्व्यवहार

♦ विशाल बसेत

१० भदौ , महोत्तरी ।  मेमोरी एण्ड माइण्ड पावर सेमिनारमा आमन्त्रित विद्यालयका अभिभावक र विद्यार्थीमाथि दुर्व्यवहार भएको छ । बर्दिबास युवा संजालको आयोजनामा भएको उक्त सेमिनारमा फ्लोरेन्स एकेडेमीमा अभिभावक र विद्यार्थीहरूमाथि दुर्व्यवहार भएको गुनासो आएको हो ।

बर्दिबासको गौतम होटलमा भएको सेमिनारमा आयोजकको अनुरोधअनुसार उक्त विद्यालयका विद्यार्थी र अभिभावक बिहीबार सहभागी हुन गएको बेला दुर्व्यवहार भएको विद्यालयका प्रधानध्यापक सन्तोष बानियाले जानकारी दिए ।

अभिभावक र विद्यार्थीमाथि भएको दुर्व्यवहारप्रति विद्यालयले घोर भत्सर्ना गरेको बानियाले बताए । विद्यालय जस्तो संवेदनशील संस्थाप्रति भएको उक्त निन्दनीय कार्यप्रती गम्भीर आपत्ति जनाउँदै विद्यालयले उक्त कार्यक्रममा सहभागी नहुन अनुरोध गरेको छ ।

६ भदौदेखि संचालनरत उक्त सेमिनार शुक्रबारसम्म चल्नेछ । प्रवेश निस्शुल्कको बहानामा ९ हजार रुपैयाँसम्म लिएर सेमिनारमा ठगी भइरहेको प्रधानध्यापक बानियाको आरोप छ ।