बुटवल अन्तर्राष्ट्रिय सम्मेलन केन्द्र तयार, आज प्रधानमन्त्रीले उद्घाटन गर्ने

११ भदौ, बुटवल । प्रधानमन्त्री शेरबहादुर देउवाले आज (शनिबार) बुटवलमा बनेको अन्तर्राष्ट्रिय सम्मेलन केन्द्रको उद्घाटन गर्ने भएका छन् ।

एक अर्ब ११ करोड रुपैयाँको लागतमा बनेको सम्मेलन केन्द्रको बिहान १० बजे उद्घाटन गर्ने कार्यक्रम तय भएको जनाइएको छ ।

उद्घाटन कार्यक्रममा एमाले उपाध्यक्ष तथा पूर्वअर्थमन्त्री विष्णु पौडेल, गृहमन्त्री बालकृष्ण खाँण, सहरी विकास मन्त्री मेटमणि चौधरी, लुम्बिनी प्रदेशका मुख्यमन्त्री कुलप्रसाद केसीलगायतका नेताहरूले सम्बोधन गर्ने कार्यक्रम रहेको छ ।

पूर्वपश्चिम राजमार्गसँग जोडिएको बुटवल उपमहानगरपालिका–१० रामनगरस्थित बुटवल मण्डपको साढे ९ बिघा क्षेत्रफलमा सम्मेलन केन्द्र बनेको हो ।