समानुपातिकतर्फ २९ दलको मनोनयन, कुन प्रदेशमा कति दल ?

११ भदौ, काठमाडौं । निर्वाचन आयोगले शुक्रबारबाट समानुपातिकतर्फको मनोनयन दर्ता सुरु गरेको छ । पहिलो दिन प्रतिनिधि सभातर्फ२९ दलले मनोनयनको निवेदन दिएका छन् ।

राजनीतिक दलबाट मनोनयनको निवेदन लिने कार्यभदौ १० गतेदेखि १२ गतेसम्म चल्नेछ । आयोगमा रहेको मुख्य निर्वाचन अधिकृतको कार्यालयमा राजनीतिक दलले मनोनयनको निवेदन बुझाएका छन् । आयोगका प्रवक्ता शालिग्राम शर्मा पौडेलले भने, “समानुपातिकतर्फ राजनीतिक दल नै उम्मेदवार हुने भएकोले अहिले निवेदन दिने दलको चुनाव चिह्न मात्रै समानुपातिकतर्फको मतपत्रमा समावेश हुनेछ ।”

आयोगले निर्वाचन प्रयोजनका लागि साउन २२ देखि ३१ गतेसम्म दल दर्ता गरेको थियो । सो अवधिमा दर्ता भएका दलले मात्रै समानुपातिकतर्फ मनोनयन दिन पाउनेछन् । आयोगका अनुसार शुक्रबार समानुपातिकतर्फ प्रदेशसभा अन्र्तगतप्रदेश नं १ मा २५, मधेश प्रदेशमा २७ र बागमती प्रदेशमा २६ दलले मनोनयनको निवेदन दिएका छन् । गण्डकीमा २५, लुम्बिनीमा २६, कर्णालीमा २२ र सुदूरपश्चिममा २३ दलले निवेदन दिएका छन् ।