बालेनलाई भष्म गर्न उनको घर पुगेका जोगी भेषका एक व्यक्ति पक्राउ

१२ भदौ, काठमाडौं ।  काठमाडौं महानगरपालिकाका मेयर बालेन शाहको घरबाट प्रहरीले जोगी भेषका एक व्यक्तिलाई पक्राउ गरेको छ । शनिबार राति काठमाडौं महानगरपालिकाका मेयर बालेन शाहको घरमा गएर दुव्र्यवहार गरेको आरोपमा एकजना पक्राउ गरिएको हो ।

जोगीमा भेषमा रहेका उनी ‘भष्म गर्दिन्छु’ भन्दै बालेनको निवास गैरीगाउँ पुगेका थिए । उनलाई अहिले प्रहरी हिरासतमा राखिएको छ । उनीबारे अनुसन्धान भइरहेको काठमाडौं प्रहरीले जनाएको छ ।

जोगीको भेष धारण गरेका एक व्यक्ति गएराति साढे ८ बजेको समयमा बालेनको घरभित्रै पसेका कारणले पक्राउ गरिएको प्रहरीले जनाएको छ । घरभित्रै पसेर ‘भष्म गर्दिन्छु’ भन्दै बालेनलाई दुव्र्यवहार गरेपछि उनलाई पक्राउ गरिएको थियो ।

जोगीको भेषमा रहेका उनले ‘भष्म’ गरिदिने चेतावनी दिएका थिए । भित्रै पसेका उनलाई बाहिर निकालिएको थियो । त्यसपछि भनाभन भएको थियो । जोगीले आफुलाई प्रधानमन्त्री र मन्त्रीलेसमेत केही गर्न नसक्ने बताइरहेका थिए । झण्डै एक घण्टा सकडमा भीडभाड भएको थियो ।