महानगरको अभियान सकारात्मक : उपप्रमुख सुनिता डंगोल

१२ भदाै, काठमाडाैं। उपप्रमुख सुनिता डंगोलले काठमाडौ‌ महानगरपालिकाको अतिक्रमित संरचना हटाउने अभियान सकारात्मक भएको प्रतिक्रिया दिएकी छन् । पछिल्लो समय सार्वजनिक वा सरकारी जग्गा अतिक्रमण गरी निर्माण गरेका अनधिकृत संरचना हटाउने अभियान सकारात्मक रहेको उनले बताएकि छन् ।

उनले सामाजिक सञ्जालमा आज एक अपिल सार्वजनिक गर्दै यस्तो बताएकी हुन् । ‘सार्वजनिक वा सरकारी जग्गा अतिक्रमण गरी निर्माण गरेका अनधिकृत संरचना (निर्माण कार्य तथा नक्सा स्वीकृति गर्दा भुइँतला वा बेसमेन्टलाई पार्किङको प्रयोजन देखाएपछि अन्य व्यापारिक प्रयोजनमा लगाएका संरचना) हटाउने कार्यलाई केही दिनदेखि काठमाडौं महानगरपालिकाले निरन्तरता दिँदै आएको विदितै छ,’ उनले अपिलमा भनेकी छिन्, ‘त्यस्ता अनधिकृत संरचना हटाउने अभियान काठमाडौं महानगरपालिकाको हो । म काठमाडौं महानगरपालिकाको उपमेयरको हैसियतमा छु । त्यसैले काठमाडौं महानगरपालिकाको यो अभियानमा मेरो साथ, सहयोग र समर्थन रहेको स्मरण गराउन चाहन्छु ।’