ओली नेतृत्वमा एमालेले बनायो निर्वाचन परिचालन कमिटी

१२ भदौ, काठमाडौं । नेकपा एमालेले पार्टी अध्यक्ष केपी शर्मा ओलीको नेतृत्वमा मंसिरमा हुने आमनिर्वाचनका लागि ४ सय ५१ सदस्यीय केन्द्रीय निर्वाचन परिचालन समिति गठन गरेको छ । समितिमा केन्द्रीय कमिटीका सबै सदस्य, केन्द्रीय आयोगका पदाधिकारीहरू, विभागका सचिव, जनसंगठनको अध्यक्ष र महासचिव सदस्य रहेका छन् ।

परिचालन समिति अन्तर्गत सचिवालयमा केन्द्रीय पदाधिकारी, निर्वाचन विभाग, कानुन विभाग र प्रचार विभागका उपप्रमुख र सचिव तथा केन्द्रीय कार्यालयका सचिव सदस्य रहने सचिवालय गठन गरेको प्रचार विगभाका सचिव गगन विष्टले जानकारी दिए । परिचालन कमिटी र त्यसको सचिवालय दुवैको सचिवमा पार्टीका उपमहासचिव विष्णु रिमाललाई बनाउने निर्णय गरेको छ ।

’प्रत्येक मतदान केन्द्रमा निर्वाचन परिचालन कमिटी बनाउने निर्णय गरिएको छ । केन्द्रीय निर्वाचन परिचालन समितिको बैठकले प्रदेश, जिल्ला, पालिका, वडा र मतदान केन्द्र (बुथ)सम्म निर्वाचन परिचालन कमिटी बनाउने निर्णय गरेको हो,’ विष्टले भने, ’परिचालन समिति अन्तर्गत उप समितिहरू गठन गरेर काम अघि बढाउने निर्णय भएको छ ।’