समानुपातिकको मतपत्रमा ६८ चुनाव चिह्न रहने

१३ भदौ, काठमाडौं । आगामी प्रतिनिधिसभा सदस्य निर्वाचनमा समानुपातिक निर्वाचन प्रणाली तर्फ स्पर्धा गर्न ६८ निवेदन परेका छन् । निवेदन बुझाएका दलबारे छानबीनपछि निर्वाचन आयोगले भदौ १५ गते अन्तिम नामावली प्रकाशन गरी चुनाव चिह्न प्रदान गर्नेछ ।

प्रतिनिधिसभामा समानुपातिकतर्फको मतपत्रमा अब ६८ चिह्न मात्रै रहनेछन् । दल दर्ता हुँदा दश वटा चिह्न पाउन दाबी गरेका दलले भने निवेदन दिएन । मंसिर ४ गते हुने चुनावमा भाग लिन आयोगले राजनीतिक दल दर्ता आह्वान गर्दा ७९ चिह्नका लागि ८७ दल दर्ता भएका थिए । ७५ राजनीतिक दलले एकल चुनाव चिह्नका लागि दर्ता भएकोमा नेपाल कम्युनिष्ट पार्टी एकता राष्ट्रिय अभियानले चुनावमा भाग नलिने जनाएपछि दर्ता भएकामध्ये उक्त दल हटेको छ ।

निर्वाचन आयोगका अनुसार समानुपातिकतर्फ ७६ राजनीतिक दलका ६८ निवेदन परेको छ । आयोगले भदौ १० देखि १२ गतेसम्म समानुपातिक निर्वाचन प्रणालीमा भाग लिन चाहने दललाई निवेदन दिन आह्वान गरेको थियो । चुनाव तालमेल गरेर १२ राजनीतिक दल चार समूहमा निवेदन दिएका छन् । आयोगको कानुन तथा राजनीतिक दल व्यवस्थापन महाशाखाका अनुसार मतपत्रमा उक्त १२ दलको चार चुनाव चिह्न मात्रै रहने हुँदा दर्ता भएको दलको अपेक्षा मतपत्रमा चुनाव चिह्न कम हुनेछ ।

आयोगका अनुसार समानुपातिकतर्फ प्रदेश सभा मधेश प्रदेशमा सबैभन्दा बढी राजनीतिक दल भाग लिनेछन् । मधेश प्रदेशमा समानुपातिकतर्फको मतपत्रमा ६७ दलको ५९ चुनाव चिह्न रहनेछन् ।

वागमती प्रदेशमा ६६ दलको ५८ चिह्न रहने आयोगले जनाएको छ । प्रदेश १ मा ६३ दलको ५५ वटा चुनाव चिह्नका लागि निवेदन परेका छन् । गण्डकी प्रदेशको मतपत्रमा ६० दलको ५२, लुम्बिनीमा ६२ दलको ५४, कर्णालीमा ५७ दलको ४९ र सुदूरपश्चिममा ५८ दलको ५० चुनाव चिह्न रहनेछ ।