रिजालद्वारा स्याङजा एक (क) बाट प्रदेशसभा सदस्यको उम्मेदवारीका लागि आवेदन दर्ता

१३ भदौ, काठमाडौं ।  नेपाली कांग्रेसका युवा नेता एवं वरिष्ठ पत्रकार इन्द्रबहादुर रिजालले स्याङजा क्षेत्र न.१ (क) बाट प्रदेशसभा सदस्यको उम्मेदवारीका लागि आवदेन दर्ता गराएका छन् । सोही क्षेत्रबाट नेपाली कांग्रेसको १४ औँ महाधिवेशनमा महाधिवेशन प्रतिनिधिसमेत रहेका रिजालले सोमबार प्रदेशसभा सदस्यको उम्मेदवारका लागि आवेदन दिएका हुन् ।

विद्यार्थीकालदेखि नै राजनीतिमा सक्रिय रहेका रिजालले यसअघि जिल्ला तथा क्षेत्रीय स्तरका विभिन्न जिम्मेवारी सम्हाल्दै आएका थिए । उनी लामो समयदेखि पत्रकारिता क्षेत्रमा पनि सक्रिय रहदै आएका छन् । रिजाल हाल सदाबहार मिडिया हाउसका अध्यक्ष तथा नेपालबहस डटकमका प्रधान सम्पादकसमेत हुन् ।

रिजालले उम्म्मेदवारी सिफरिसका लागि आवेदन दिएपछि स्याङ्जा क्षेत्र.१ (क) का कांग्रेस कार्यकर्तादेखि स्थानीय जनताहरुले समेत उनलाई स्वागत गरेका छन् । २०४४ सालदेखि नेपाल विद्यार्थी संघको राजनीतिबाट अगाडि आएका रिजाल नेविसंघको जिल्ला उपाध्यक्ष हुँदै विद्यार्थी संघले गरेका हरेक आन्दोलनमा सक्रिय रहँदै आएका थिए ।

पत्रकारिता र राजनीतिलाई संगै एकसाथ अगाडि बढाएका रिजाल अर्थराजनीतिक विश्लेषक समेत हुन् । आर्थिक क्षेत्रमा उनले चलाएको कलमले बेला–बेला तरंग नै पैदा गर्ने गरेको छ । विगत ३ दशकदेखि मूलधारको पत्रकारितामा सक्रिय रिजाल प्रखर वक्ता, निष्ठाको राजनीति गर्ने र नेपाली कांग्रेसमा अवसर नपाएका नेताका रुपमा चिनिन्छन् ।

आगामी मंसिर ४ गते हुने निर्वाचनमा उनको लोकप्रियता र बौद्धिकतालाई मूल्याङ्कन गर्दै स्याङ्जा क्षेत्र न.१ (क) बाट नेपाली कांग्रेसले उनलाई उम्मेदवार बनाउने निश्चत प्राय भएको छ । स्याङजा पत्रकार समाजका अध्यक्षसमेत रहेका रिजालले पत्रकारिताको माध्यमबाट स्थानीय स्तरमा पुर्याएको योगदानको कदरका लागि पनि उनले टिकट पाउनैपर्ने स्थानीय नेता कार्यकर्ताहरु बताउँछन् ।