मन्त्रीले आफ्नो क्षेत्रबाहिर प्रचार गर्न नपाउने, स्थानीय जनप्रतिनिधिलाई पनि रोक

१४ भदौ, काठमाडौं । निर्वाचन आचारसंहितामा नेपाल सरकार, प्रदेश सरकार वा उक्त निकायका मन्त्री र स्थानीय कार्यपालिका तथा सोका पदाधिकारीले प्रचार प्रसार गर्न नपाउने व्यवस्था गरिएको छ । तर मन्त्री नै उम्मेदवार भएको अवस्थामा आफ्नो क्षेत्रमा मात्रै प्रचार प्रसार गर्न पाउनेछन् ।

मङ्सिर ४ गते हुने आम चुनावका लागि निर्वाचन आयोगले तयार गरेको निर्वाचन आचारसंहिता, २०७९ मा यसप्रकारको व्यवस्था गरिएको छ ।

उक्त व्यवस्थाले सङ्घीय सरकारका मन्त्री, सात वटै प्रदेश सरकारका मन्त्री चुनावमा मनोनयन गरे आफ्नो क्षेत्रभन्दाबाहिर चुनाव प्रचार प्रसार गर्न पाउने छैनन् । त्यसैगरी, स्थानीय चुनावबाट निर्वाचित ३५ हजारभन्दा बढी जनप्रतिनिधि प्रचार प्रसार गर्न पाउने छैनन् । आचारसंहिताले कार्यपालिकाका सदस्य तथा पदाधिकारीले कुनै राजनीतिक दलको पक्ष वा विपक्षमा चुनाव प्रचार प्रसार गर्न नपाउने व्यवस्था गरेको छ । आचारसंहिताले मन्त्रीले आफैं चुनावमा स्पर्धा गर्दा सरकारी साधनस्रोतको प्रयोग गर्न पाउने छैनन् ।