कमल थापा नेतृत्वको राप्रपा नेपाल चुनाव चिह्नविहीन

१४ भदौ, काठमाडौं । राष्ट्रिय प्रजातन्त्र पार्टी(राप्रपा) नेपाल चुनाव चिह्नविहीन भएको छ । प्रतिनिधि सभा तथा प्रदेश सभा सदस्य निर्वाचनका लागि राजनीतिक दलहरु चुनावी अभियानमा जुटिरहँदा राप्रपा नेपाल भने चुनाव चिह्नविहीन बन्नुपरेको छ ।

कमल थापा नेतृत्वको राप्रपा नेपाललाई निर्वाचन आयोगले भदौ ८ गते ‘तिर’ चुनाव चिह्न दिन गरेको निर्णयमा सर्वोच्च अदालतले कार्यान्वयन नगर्न अन्तरिम आदेश जारी गरेको छ । त्यसअघि, आयोगले असार २७ गते अध्यक्ष थापाले माग गरेको ‘गाई’ चुनाव चिह्न दिन नमिल्ने निर्णय गरेको थियो । आयोगको उक्त निर्णयप्रति चित्त नबुझेको थापा सर्वोच्च अदालत पुगेका थिए ।

सर्वोच्च अदालतले साउन ८ गते उक्त चिह्न अन्य कुनै दललाई नदिनुु भन्दै अन्तरिम आदेश जारी गरेको थियो । तिर चुनाव चिह्न दिने निर्णय कार्यान्वयन नगर्ने सवोच्चको अन्तरिम आदेशमा भनिएको छ, “यो रिट निवेदनको विषयवस्तुु जोडिएको देखिदा छलफलको मितिसम्मका लागि निवेदकलाई भदौ ८ गतेको ‘तिर’निर्वाचन चिह्न प्रदान गर्ने निर्णय कार्यान्वयन नगर्नु, नगराउनुु भनि नियमावली बमोजिम अन्तरिम आदेश जारी गरिदिएको छ ।”

यसरी दुवै मुद्दामा सर्वोच्च अदालतले अन्तरिम आदेश जारी गरेपछि राप्रपा नेपाल चुनाव चिह्नविहीन बन्न पुगेको छ । सर्वोच्चले उक्त दुवै मुद्दाको विषयमा छलफलका लागि भदौ १४ गते पेशी तोकेको छ ।