निर्वाचन आयोगको फितलो व्यवस्थापन, कागजको टुंगो बिनै आठ करोड मतपत्र छाप्ने तयारी

१४ भदौ,काठमाडौं । निर्वाचन आयोगले भदौ २० गतेबाट आगामी निर्वाचनका लागि मतपत्र छपाइको काम सुरुगर्ने कार्यतालिका बनाएको छ । एकै पटक धेरै काम सम्पन्न गर्नुपर्ने भएकाले हतारमा देखिएको निर्वाचन आयोगको व्यवस्थापन भने निकै फितलो भएको गुनासो आउन थालिसकेको छ ।

प्रत्यक्ष र समानुपातिक गरी करिब ८ करोडभन्दा बढी मतपत्र नछापी नपुग्ने आगोगको ठहर छ । तर, मतपत्र छाप्नका लागि कागजको अपहलेसम्म जोहो भएको छैन् । स्थानीय तहको निर्वाचनमा मतपत्र छोपेर बाँकि रहेको सीमित कागजबाट प्रदेश र प्रतिनिधिसभाका लागि मतपत्र छाप्न सुरु गरिने आयोगका अधिकारीहरु बताउँछन् ।

मंसिर ४ गते हुने प्रदेश र प्रतिनिधिसभा निर्वाचनका लागि राजनीतिक दल दर्ताको काम सकिएको छ । यो काम सकिएसँगै आयोगले मतपत्र छाप्ने काम सुरु गर्न लागेको हो । समानुपातिक प्रणालीमा भाग लिन आइतबारसम्म दल दर्ताका लागि दिएको समय सकिएसँगै आयोगले भदौ २० बाट मतपत्र छाप्ने भन्दै काम अगाडी बढाउन भनेको छ तर बाँकि कागज कहाँबाट कसरी र कुन प्रक्रियाबाट ल्याउने भन्ने निधो गरेको छैन् ।
प्रतिनिधिसभा निर्वाचनमा प्रत्यक्षतर्फ भाग लिन ७८ राजनीतिक दलले निर्वाचन आयोगमा निवेदन दिएका छन् । आयोगले समानुपातिक प्रणालीतर्फ भाग लिनका लागि आइतबार साँझसम्म दिएको समयमा प्रतिनिधिसभातर्फ दल संख्या ७६ रहे पनि निवेदन संख्या ६८ मात्र छ ।

प्रदेश १ मा दल संख्या ६३ रहेकोमा निवेदन संख्या ५५ को परेको छ । मधेस प्रदेशमा ६७ राजनीतिक दल रहे पनि निवेदन संख्या ५९, बागमती प्रदेशमा दल संख्या ६६ रहे पनि निवेदन संख्या ५८, गण्डकी प्रदेशमा दल संख्या ६० रहेकोमा निवेदन संख्या ५२ रहेको छ ।

लुम्बिनीमा ६२ दल संख्या रहेकोमा ५४, कर्णालीमा ५७ दल रहेकोमा ४९ र सुदूरपश्चिम प्रदेशमा दल संख्या ५८ रहेकोमा निवेदन संख्या ५० रहेको आयोगले जनाएको छ । आयोगले मतदाता नामवलीमा देखिएका त्रुटि पनि सच्याउन सुरु गरेको छ । आयोगले मतपेटीसहितका निर्वाचनका लागि आवश्यक पर्ने अन्य सामग्री खरिद प्रक्रिया अघि बढाएको छ भने मतदानस्थलको अध्यावधिक गर्ने कामलाई पनि आयोगले अघि बढाएको जनाएको छ ।

प्रदेश र प्रतिनिधिसभा निर्वाचनका लागि समानुपातिक र प्रदेशका दुईदुई गरी चार प्रकारका मतपत्र छाप्नुपर्नेछ । प्रतिनिधिसभातर्फको समानुपातिक र प्रत्यक्षको एक÷एक गरी दुई मतपत्र आयोगले छाप्ने छ ।

प्रदेशसभा सदस्यतर्फको प्रत्यक्ष र समानुपातिकको मतपत्र भने प्रदेशअनुसार फरक–फरक हुने आयोगको भनाइ छ । यसका लागि आयोगले प्रदेश र प्रतिनिधिसभाको प्रत्यक्ष र समानुपातिकतर्फका लागि दुई/दुई करोड गर्दा आठ करोड मतपत्र आवश्यक पर्छ ।

अयोग कर्मचारीले दिएको जानकारीअनुसार भदौ २० बाट आयोगले चार प्रकारका मतपत्र छाप्न सुरु गर्दैछ । तर, मतपत्र छाप्नका लागि आवश्यक कागत खरिदका लागि टेण्डर भएको छैन ।

आज (मंगलबार) सम्ममा टेन्डर आह्वान गर्ने आयोगको तयारी थियो । टेण्डरको काम भइरहँदा स्थानीय तह निर्वाचनका बेला बचेको कागतबाट मतपत्र छाप्ने काम सुरु गर्ने ति कर्मचारीले बताए । मतपत्रको साइजसहितका विषयमा पनि आयोग टुंगोमा पुगिसकेको छैन ।