सञ्चारमन्त्री कार्कीलाई प्रधानमन्त्रीको निर्देशन, ‘सञ्चारसम्बन्धी कानूनहरू चाँडो टुंगोमा पुर्याउनू’

१४ भदौ, काठमाडौं ।  प्रधानमन्त्री शेरबहादुर देउवाले सञ्चारसम्बन्धीका विभिन्न कानुनहरूलाई चाँडो टुंगोमा पुर्याउन सञ्चार तथा सूचना प्रविधिमन्त्री ज्ञानेन्द्रबहादुर कार्कीलाई निर्देशन दिएका छन् । उनले फोनमार्फत चालु अधिवेशनमा नै यस्ता कानूनहरु टुंगोमा पुर्याउन मन्त्री कार्कीलाई निर्देशन दिएका हुन् ।

मंगलबार नेपाल पत्रकार महासंघका पदाधिकारीहरूसँगको भेटमा प्रधानमन्त्री देउवाले मिडिया काउन्सिल विधेयकसहित विचाराधीन अवस्थामा रहेका विधेयकहरुलाई टुंगोमा पुर्याउन सरकारले पहल गरिहेको बताएका थिए ।

प्रतिनिधिसभाको ५ वर्षे कार्यकाल सकिनै लाग्दा समेत सञ्चारसम्बन्धी विभिन्न कानुनहरू टुंगोमा पुग्न नसकेको भन्दै महासंघका पदाधिकारीहरूले प्रधानमन्त्री देउवालाई भेटेर मंगलबार ध्यानाकर्षण गराएका हुन् ।

महासंघका अध्यक्ष विपुल पोखरेलसहित पदाधिकारीसँग भेटपछि प्रधानमन्त्री देउवाले महासंघले उठाएका र राखेका मागहरूलाई सकारात्मक रूपमा लिई तत्काल टुंगोमा पुर्याउनका लागि पहल गर्न सञ्चार तथा सूचना प्रविधिमन्त्री ज्ञानेन्द्रबहादुर कार्कीलाई फोनमार्फत निर्देशन दिएका थिए ।

महासंघका अध्यक्ष पोखरेलले प्रधानमन्त्रीसँगको भेटमा मिडिया काउन्सिल विधेयकलगायत सञ्चारसम्बन्धी विभिन्न कानुनहरू चालू अधिवेशनमा नै टुंगोमा पुर्याउन पहल गर्न आग्रह गरिएको र सकारात्मक प्रतिक्रिया पाएको बताए ।

महासंघले अहिले सञ्चारसम्बन्धी कानुन नहुँदा विद्युतीय कारोबार ऐनलगायतका विभिन्न कानुनहरू आकर्षित गरी पत्रकारलाई दुःख दिने काम गरिएको भन्दै चिन्ता प्रकट गरेको छ ।

महासंघले प्रतिनिधिसभा भङ्ग हुनुअगावै सञ्चारसम्बन्धी कानुनका विषयलाई टुंगोमा पुर्याउन पहल गर्नका लागि सभामुख अग्निप्रसाद सापकोटालाई पनि भेटेर ध्यानाकर्षण गराउने कार्यक्रम रहेको अध्यक्ष पोखरेलले जानकारी दिए ।