मोरङमा कोइराला र शर्मा सुरक्षित, अरुमा घम्साघम्सी कायमै

१५ भदौ, विराटनगर । नेपाली कांग्रेसको आधार क्षेत्र मानिएको मोरङ पछिल्लो समय कमजाेर बन्दै गइरहेको छ । केन्द्रीय स्तरका धेरै नेता रहेपनि उनीहरुले मोरङमा कांग्रेसको उपस्थितिलाई बलियो बनाउन सकेका छैनन् । अन्तरिक कलह तथा पक्ष र विपक्षबीचमा मुख ताकाताकले मोरङमा कांग्रेसलाई कमजाेर बनाउने काम गइरहेको छ ।

२०७४ को आम निर्वाचनमा मोरङ ६ बाट पराजित भएका डा. शेखर कोइराला यसपटक भने सुरक्षित देखिएका छन् । गएको निर्वाचनमा पनि उक्त क्षेत्र कांग्रेस पराजित हुने क्षेत्र थिएन । कोइरालाको सामान्य गल्ती र अहंकारले गर्दा मात्रै ६७५ मतले पराजित भएका हुन् । २०७४ मा वडा नं ३ र ४ को ६२५ भोटका विषयमा कुरा नमिल्दा एमालेका लालबाबु पण्डितसँग पराजित हुन पुगे ।

यसपटक पनि कोइरालालाई अन्तर्घातको सम्भावना भने धेरै देखिएको छ । मोरङमा संस्थापन पक्षका केही नेताहरु कोइराला नजिक हुन चाहिरहेका छैनन् । पार्टीभित्रैबाट हुने अन्तर्घात उनका लागि मुख्य टाउको दुखाइको विषय बन्न सक्छ । अर्को महत्वपूर्ण पक्ष भनेको कोइरालाले आफ्नो क्षेत्रमा रहेका आफ्ना पक्षका नेताहरुलाई पनि सुरक्षित अवतरण गराउन सकेका छैनन् ।

पहिले उनकै पक्षमा रहेका पूर्व मेयर भीम पराजुलीदेखि गुरु घिमिरेसम्मका धेरै नेता कार्यकर्ताहरु कोइरालाबाट संरक्षित हुन् चाहिरहेका थिए । उनीहरुमध्ये पराजुली सिटौला पक्षमा गइसकेका छन् । पराजुली कोइरालाको क्षेत्रका बलिया कांग्रेस कार्यकर्ता हुन् ।

स्थानीय तहको निर्वाचन २०७९ मा गठबन्धनको आलोचना गर्दै आएका डा. शेखरले गृहनगरमा आयोजित कार्यक्रममा गठबन्धनका कारण स्थानीय तहहरुमा कांग्रेसले राम्रो नतिजा ल्याउन सफल भएको स्वीकार गरेका छन् । तर, २०७४ कोभन्दा स्थानीय तहमा पनि कांग्रेस खस्किएको छ ।

मोरङको निर्वाचन क्षेत्र नम्बर ६ मा विराटनगर महानगरपालिकाका ७, बुढीगंगा गाउँपालिका र सुन्दरहरैंचा नगरपालिकाका ६–६ वटा वडा पर्दछन् । २०७४ को निर्वाचनमा एमालेका पण्डितले ३३ हजार ९४१ मत प्राप्त गरी विजयी हुँदा कोइरालाले ३३ हजार २६६ मत प्राप्त गरेका थिए ।

भर्खरै सम्पन्न स्थानीय तहको निर्वाचन परिणामलाई हेर्दा यो निर्वाचन क्षेत्रका विभिन्न वडाहरुमा कांग्रेस एक्लैले २८ हजार ४२८ मत प्राप्त गरेको छ । गठबन्धनमा रहेको दल नेकपा माओवादी केन्द्रले ५ हजार ३५६, जसपाले ३ हजार ९३९ र एकीकृत समाजवादीले ३ हजार ३६९ मत प्राप्त गरेका थिए ।

गठबन्धनको मतलाई आधार मान्दा कांग्रेस योपटकको निर्वाचनमा मोरङ ६ मा सहज अवस्थामा देखिन्छ । उता, मोरङ ३ बाट प्रतिनिधिसभाको प्रत्यक्ष तर्फको उम्मेदवारमा डा. सुनिल शर्मा एकल सिफारिस भएका छन् । नोबेल मेडिकल कलेज तथा शिक्षण अस्पताल विराटनगर र काठमाडौं मेडिकल कलेजका सञ्चालक शर्माको एकल नाम सिफारिस भएकाले उनी पक्का उम्मेदवार भइसकेका छन् ।

२०७४ सालको निर्वाचनमा उनी वाम गठबन्धनका उम्मेदवार भानुभक्त ढकालसँग पराजित भएका थिए । नेकपा एमालेका ढकालले ४२ हजार ४१३ मत प्राप्त गर्दा शर्माले ४० हजार ५०७ मत प्राप्त गरेका थिए ।

यस्तै मोरङ ४ मा भने अझै विवाद कायमै छ । प्रतिनिधिसभा निर्वाचनमा मोरङको क्षेत्र नम्बर ४ मा सत्तारुढ गठबन्धनका दुई दल नेपाली कांग्रेस र माओवादी केन्द्रले दाबी गरेका छन् । माओवादीबाट एक्लो दाबेदार अमनलाल मोदीले भने चुनावी अभियान सुरु गरिसकेका छन् । कांग्रेसबाट तीन जना दाबेदार भएकाले टिकट कसले पाउला भन्ने चासो अझै कायमै छ ।

गत चुनावमा माओवादी केन्द्रबाट अमनलाल मोदी यो क्षेत्रबाट विजयी भएका थिए । मोदीसँग पराजित कांग्रेस उम्मेदवार महेश आचार्यसहित कांग्रेसकै गुरुराज घिमिरे र भीम पराजुली पनि टिकटमा दावी गरिरहेका छन् । यूवा नेता घिमिरे अहिलेसम्म कांग्रेसमा अवसर नपाएका नेता हुन् । उनी कांग्रेसमा इमान्दार र युवा वर्गमा लोकप्रिय मानिन्छन् । कांग्रेसका नेता आचार्य पनि पार्टीका कार्यक्रमहरुमा सहभागी भइरहेका छन् । २०७४ सालको निर्वाचनमा एमाले र माओवादी गठबन्धनबाट माओवादी उम्मेदवार अमनलाल मोदी ३३ हजार ५ सय २९ मतसहित विजयी हुँदा आचार्यले २६ हजार ८ सय मत प्राप्त गरेका थिए । अहिले क्षेत्र नम्बर ४ मा माओवादीको तुलनामा कांग्रेस बलियो देखिएको छ ।

२०७४ सालको निर्वाचनमा मोरङका ६ मध्ये एमालेले ३, माओवादीले २ र कांग्रेसले एउटा क्षेत्र जितेका थिए । यसपटक माओवादीले मोरङका दुई वटा क्षेत्र दाबी गरिरहेको छ । तर प्रतिनिधिसभाका दुवै क्षेत्र छाड्नलाई नेपाली कांग्रेसले मानिरहेको छैन । क्षेत्र नम्बर ५ मा कांग्रेसबाट अमृत अर्याल दाबेदार छन् । क्षेत्र नम्बर ५ मा माओवादीबाट शिवकुमार मण्डल पनि दाबेदार छन् । २०७४ सालको निर्वाचनमा मण्डलले नै अर्याललाई पराजित गरेका थिए ।

पार्टी सभापति शेरबहादुर देउवा निकट रहेका अर्याल यो पटक टिकट लिने दाउमा छन् । विराटनगरको मेयरमा पनि दाबी गरेका उनले अन्तिम समयमा संघको टिकट लिने भन्दै नागेश कोइरालालाई समर्थन गरेका थिए । पार्टीको प्रभाव क्षेत्र रहेको दाबी गर्दै आएको जसपाले पनि क्षेत्र नम्बर ५ आफूले पाउनुपर्ने दाबी गर्दै आएको छ ।

नेकपा एमालेले क्षेत्र नम्बर ४ मा विनोद ढकाललाई उम्मेदवार बनाउने तयारी गरेको छ । क्षेत्र नम्बर ४ मा अन्य दाबेदार नभएका कारण ढकालले टिकट पाउने लगभग निश्चित छ । एमालेले क्षेत्र नम्बर ५ मा जीवन विकास समाज लघुवित्तका संस्थापक अध्यक्ष योगेन्द्र मण्डललाई अघि सारेको छ । औपचारिक निर्णय नभए पनि उनी चुनावी अभियानमा छन् ।

स्थानीय तह निर्वाचनलाई आधार मान्ने हो भने मोरङ क्षेत्र नम्बर ४ मा पर्ने वडाहरुमा एमालेले २५ हजार ७३०, नेपाली कांग्रेसले २१ हजार ८९४, माओवादी केन्द्रले ९ हजार ९९०, जसपाले ३ हजार ११२ र नेकपा एकीकृत समाजवादीले १ हजार २५५ मत पाएका थिए ।

यसैगरी क्षेत्र नम्बर ५ मा कांग्रेसले १९ हजार ४९८, एमालेले १५ हजार ६८०, जसपाले १३ हजार २४९, माओवादी केन्द्रले ११ हजार ६२८, राप्रपाले १ हजार ८८७, लोसपाले ७५२ र नेकपा एकीकृत समाजवादी ६०८ मत पाएका थिए । मोरङ क्षेत्र नं १ मा पनि अहिले सम्म कांग्रेसले टुंग्याउन सकेको छैन ।