पदाधिकारी बैठकपछि थप तनावमा परे देउवा, जित्ने क्षेत्र नछोड्न दवाव

१५ भदौ, काठमाडौं । आज बसेको पदाधिकारी तथा पूर्वपदाधिकारीहरको बैठकपछि प्रधानमन्त्रीसमेत रहेका कांग्रेस सभापति शेरबहादुर देउवा थप दवावमा परेका छन् । बुधबार साँझ बस्ने सत्ता गठबन्धनको बैठक अघि पार्टीको धारणा बनाउन बोलाइएको पदाधिकारी बैठकमा नेताहरुले चेतावनीकै भाषामा देउवालाई जित्ने क्षेत्रमा सहमति नगर्न भनेका छन् ।

बैठकमा सभापति देउवालाई कांग्रेसले जित्नसक्ने ठाउँ गठबन्धनका अन्य दललाई नछाड्न भनिएको बैठकपछि एक नेताले नेपालबहसलाई बताए । गठबन्धनका नाममा पार्टीले जित्ने आधार भएका ठाउँमा सम्झौता नगर्न उनीमाथि नेताहरूको दबाब दिएको उनको भनाइ छ ।

प्रधानमन्त्रीको सरकारी निवास बालुवाटारमा बसेको कांग्रेस पदाधिकारी तथा पूर्वपदाधिकारीहरूको बैठकमा कांग्रेसको मत र कार्यकर्ताको भावना सम्बोधन हुने गरी गठबन्धन गर्नुपर्नेमा नेताहरूले जोड दिएका थिए । नेता रामचन्द्र पौडेलले बैठकमा सहभागी नेताहरूले आफूहरू गठबन्धनप्रति प्रतिबद्ध रहे पनि जितको आधार क्षेत्र छाड्न नहुनेमा अडिक रहेको जोड दिएको बताए ।

बैठकमा नेता अर्जुननरसिंह केसीले ६० प्रतिशतको बटमलाइन राख्ने र अन्तिममा ५५ प्रतिशतमा मिल्नुपर्ने धारणा राखेका थिए । साथै, बैठकमा गठबन्धनको पक्षमा एक स्वर बनाउनुपर्ने विषयमा पनि सबैले सहमति जनाएको नेता पौडेलले जानकारी दिए ।

कांग्रेस बैठकमा लोकतान्त्रिक समाजवादी पार्टी (लोसपा)लाई पनि चुनावी गठबन्धनमा जोड्नुपर्ने विषय पनि उठेको थियो । नेताहरूले लोसपालाई समेत सत्ता गठबन्धन दलको चुनावी गठबन्धनमा समेटेर अघि बढ्नुपर्ने बताएपछि देउवामाथि थप दवाव परेको छ । बैठकमा नेता शेखर कोइराला र विमलेन्द्र निधिले लोसपालाई पनि चुनावी गठबन्धनमा समेटेर जानुपर्ने धारणा राखेका थिए ।

प्रधानमन्त्री देउवा आफैँ पनि लोसपालाई गठबन्धनमा जोड्ने बारे सकारात्मक रहँदै आएका थिए । तर, गठबन्धनमा रहेका दलहरसँग सीट बाँडफाँडको विषय मोटामाटी मिलिसकेकाले उनलाई लोसपालाई स्थान दिन समस्या भएको छ । यसविषयमा यसअघि देउवाले लोसपाका अध्यक्ष महन्थ ठाकुरसहित नेताहरूसँग पटक पटक छलफल समेत गरेका थिए ।

मधेस प्रदेशमा ३२ प्रतिनिधि सभा सदस्य निर्वाचन क्षेत्र छन् । मधेसमा प्रभाव रहेको जनता समाजवादी पार्टी यसअघि नै गठबन्धनमा जोडिएको छ । जसपाबाटै विभाजित भएर बनेको लोसपासमेत गठबन्धनमा जोडिए मधेसमा कांग्रेसको सिट संख्या घट्न सक्ने अन्य नेताहरुले बताएका थिए ।

यसअघि जसपाबाटै विभाजित भएका नेता बाबुराम भट्टराई नेतृत्वको नेपाल समाजवादी पार्टी र बामदेव गौतम नेतृत्वको नेकपा एकता राष्ट्रिय अभियानले भने नेकपा माओवादी केन्द्रको चुनाव चिन्ह उपयोग गरेर चुनाव लड्ने सहमति गरिसकेका छन् ।