प्रश्नको उत्तर नसकिँदै किन रोकियो निलम्बित प्रधानन्यायाधीश जबराको बयान ?

१६ भदौ, काठमाडौं ।  निलम्बित प्रधानन्यायाधीश चोलेन्द्रशमशेर जबराको बिहीबारको बयान एक्कासी रोकिएको छ । जबराले दोस्रो प्रश्नको उत्तर दिइरहेका बेला उनलाई रोकेर महाअभियोग सिफारिस समितिले एक्कासी बयान रोकेको हो ।

बिहीबार सिंदरबारस्थित संसदीय समितिको कक्षमा आज दोस्रो दिन पनि जबरासित बयान लिइएको थियो । तर, बैठक आकस्मिक रूपमा रोकिएको थियो, बैठक किन रोकियो भन्ने विषयमा समितिका सदस्यले समेत जानकारी नपाएको बताएका छन् । अर्को बैठक यही भदौ १९ गते आइतबार बस्ने गरी बयान रोकिएको हो ।

जबरालाई आज ११ बजे महाअभियोग सिफारिस समिति बैठकले बयानका लागि सिंहदरवारमा बोलाएको थियो । समितिका सदस्यहरुले आज उनलाई दुईवटा प्रश्न सोधेका थिए । योसहित ४३ मध्ये ६ वटा प्रश्न सोधिएको छ । बुधबारबाट उनको बयान सुरु गरिएको हो ।

गत १ फागुनमा सत्तारुढ दलका सांसदहरुले जबराविरुद्ध महाअभियोगको प्रस्ताव प्रतिनिधिसभामा दर्ता गरेका थिए । प्रतिनिधिसभाले गठन गरेको महाअभियोग सिफारिस समितिले उनको बयान लिन थालेको थियो । बयानका क्रममा उनले महाअभियोग प्रस्ताव नै निस्क्रिय भइसकेको र न्यायाधीश, बार पदाधिकारी र राजनीतिक दलका नेतामाथि गम्भीर आरोप लगाएका थिए ।

आज पनि जबराले महाअभियोग सिफारिस समितिले सोधेको प्रश्न औचित्यहीन भएको दाबी गरेका थिए । प्रधानन्यायाधीश असक्षम र पूर्णतः विफल हुन पुगेको भन्ने आरोपको विषयमा सोधिएको प्रश्नमा उनले यसको कुनै औचित्य नभएको दाबी गरेका थिए ।

उनले समितिको प्रश्नमाथि नै प्रश्न उठाएपछि समितिमा रहेका सांसदहरू आक्रोशित भएका थिए । समिति सदस्य कल्याणी खड्काले निलम्बित प्रधानन्यायाधीश जबराको उत्तरले समितिमाथि नै प्रश्न उठाएको भन्दै विरोध गरेकी थिइन् ।

उनले विरोध जनाएपछि निलम्बित प्रधानन्यायाधीश जबराले आफूमाथि लागको आरोपको जवाफ दिएको भन्दै समितिले आफूलाई असक्षम भनेर लगाएको आरोप गलत भएको बताएका थिए । ‘मैले संवैधानिक र तत्कालीन प्रमाणबारे बोलेको हुँ; कसैलाई आरोप लगाएको होइन‚’ निलम्बित प्रधानन्यायाधीश जबराले भनेका थिए । जबराले महाभियोग प्रस्ताव गर्नेहरू नै समितिमा बस्न मिल्छ कि मिल्दैन भनेर प्रश्नसमेत उठाएका थिए ।

जबराले आफूमाथि लगाइएका आरोप तथ्यहीन भएको भन्दै संविधान र नियमावली देखाउँदै महाभियोग प्रस्तावको कुनै औचित्य नभएको समेत दाबी गरेका थिए । योसँगै निलम्बित प्रधानन्यायाधीश जबरामाथिको बिहीबारको बयान सकिएको छ ।