यसपटक पनि कैलाली-५ गुमाउँदै कांग्रेस, एकल सिफारिसका कारण आरजुलाई क्षितिज र पुस्करको काउण्टर

१७ भदौ, काठमाडौं । प्रधानमन्त्रीपत्नी आरजु राणा देउवालाई प्रतिनिधिसभा सदस्यका लागि कैलाली–५ बाट भएको एकल सिफारिस निर्वाचनमा पराजयको मुख्य कारण बन्ने देखिएको छ । केन्द्रले गरेको परिपत्र अनुसार प्रत्यक्षतर्फ तीन जना र समानुपातिकतर्फ एक महिलासहित २ जनाको नाम सिफारिस गर्नुपर्नेमा क्षेत्रीय समितिले एक पुरुष र एक महिलाको आवेदन पर्दासमेत पुरुषको नाम हटाएर आरजुलाई मात्रै एकल सिफारिस गर्दा उनीबिरुद्ध कैलाली-५ मा विद्रोह सुरु भएको छ ।

कैलाली-५ बाट प्रतिनिधिसभा सदस्यका लागि आरजुसँगै महासमिति सदस्य एवं युवा नेता क्षितिज भण्डारीले पनि उम्मेदवारीका लागि आवेदन दिएका थिए । प्रतिनिधिसभा सदस्यका लागि दुइजनाले आवेदन हालेको र दुइजनाको नै सिफारिस पठाउने भनि जिल्ला समितिको निर्णय नै सार्वजनिक भएको थियो । लगत्तै पुरुष तर्फबाट आवेदन दिएका क्षितिजको नाम हटाएपछि कैलाली—५ का कांग्रेस नेताहरु आरजुप्रति अक्रोशित भएका छन् ।

२०७४ को निर्वाचनमा कैलाली–५ बाटै उम्मेदवारी दिएकी प्रधानमन्त्री पत्नी आरजुले धनगढी–५ बाटै पुनः उम्मेदवार बन्ने इच्छा देखाएपछि एकल उम्मेदवारी सिफारिस गरेको कांग्रेस जिल्ला कार्य समितिको भनाइ छ । प्रतिनिधिसभाको निर्वाचनमा प्रत्यक्षतर्फ उम्मेदवार बन्न कांग्रेसका युवा नेता क्षितिज भण्डारीसँग कुनै सल्लाह नगरी उनलाई सिफारिस गरिएको हो । कैलाली निर्वाचन क्षेत्र नं.–५ मा नेता भण्डारीको पनि दाबी रहँदै आएको छ ।

नेपालबहससँग कुरा गर्दै महासमिति सदस्यसमेत रहेका युवा नेता भण्डारीले मंसिर ४ मा हुने निर्वाचनका लागि कैलाली निर्वाचन क्षेत्र नं. ५ मा आफुले उम्मेदवारीका लागि दिएको निवेदन केन्द्रमा नपठाउनु आरजुका लागि दुर्भाग्य भएको बताए । उनले आरजुलाई जबर्जस्ति सर्वसम्मत उम्मेदवार बनाउने प्रपन्चविरुद्धमा आफुले बिहीबार पार्टी कार्यालयमा उम्मेदवार बन्नका लागि सिफारिस गरी पाऊँ भनेर निवेदन दर्ता गराएको र सही अनुसार सहमतिमै गर्दा समेत सिफारिस नगरिएको बताए ।

कैलाली—५ बाट भण्डारीको नाम हटाएको समाचार बाहिरिएपछि कैलाली क्षेत्र न। ४ ले भण्डारीको नाम प्रतिनिधिसभा सदस्यको उम्मेदवारीका लागि सिफारिस गरेको छ । उक्त क्षेत्रबाटै संस्थापन पक्षबाट सुनिल भण्डारीको नाम पनि सिफारिस भएको छ । यसैगरी कैलाली क्षेत्र नं ५‘ख’ बाट पनि प्रदेशसभा सदस्यको उम्मेदवारीका लागि भण्डारी सिफारिसमा परेका छन् ।

युवा नेता भण्डारीले एकल सिफारिसमा परेकी आरजुले आफुसँग कुनै सल्लाह नगरेको बताए । आफुले पहिलेदेखि नै उक्त क्षेत्रबाट प्रतिनिधिसभामा चुनाव लड्ने बताइरहँदा पनि आरजुले एकपटक पनि फेरी म यही क्षेत्रबाट लड्छु नभनेको बताए । उनले भने,‘सल्लाह गरेर उम्मेदवार दिन चाहेको भए म खुशीसाथ छाडिदिन्थे । तर, उहाँले वास्ता गर्नुभएन् र आफु हार्ने विउ आफै रोपेर जानुभएको छ । नेताहरूको यदि यस्तै ताल हो भने यो क्षेत्र फेरी पनि कांग्रेसले गुमाउँछ ।’

भण्डारीले उम्मेदवारी दर्तापछि सामाजिक सञ्जालमा फोटो सार्वजनिक गर्दै बुधबार पार्टी सभापति नारायण भट्ट र केन्द्रीय नृप ओडलगायत नेताहरूसँग भेटवार्ताको सार बुझ्न नेपाली कांग्रेस पार्टीले कारबाही गरेका नेता पुष्करनाथ ओझा कहाँ पुगेर सल्लाहसमेत गरेको बताए । उनीहरुबीच आरजुका विषयमा एक घन्टाभन्दा बढी छलफल भएको थियो ।

भण्डारीका अनुसार पुष्करनाथ ओझाले आरजुबिरुद्ध उम्मेदवारी दिने निर्णय गरेका छन् । ओझाले आफूपनि कांग्रेसीको मत लिएर कैलाली क्षेत्र नः ५ बाट नै प्रत्यक्षमा उम्मेदवारी दिने र केन्द्रीय सभापति देउवाले भेट्न चाहेमा उम्मेदवार हुनेबारे भेट्न तयार रहेको बताएका थिए । ओझाले स्वतन्त्र रुपमा उम्मेदवारी दिएपनि आरजुको भन्दा बढी मत पाउन सक्ने भण्डारीले बताए ।

नेता भण्डारीले अघिल्लो पटक पनि आरजुविरुद्धमा प्रतिनिधिसभामा उम्मेदवारी दिएर पछि अर्को निर्वाचनमा टिकट दिने शर्तमा फिर्ता लिएको तर, यो पटक आफुलाई एक शब्दसमेत नसोधिएको गुनासो गरे । यता, पार्टी जिल्ला र क्षेत्रीय समितिमा रहेका नेताहरुले भने बालुवाटारको दवावमा भण्डारीको नाम सिफारिस गर्न नसकिएको बताएका छन् । उनीहरुकै भनाइमा,‘भण्डारीको नाम नपठाउन भनेको नेपाली कांग्रेसको लोकतान्त्रिक चरित्र र पद्धति विपरीत कुरा थियो । तर, केन्द्रको निर्देशन मान्न हामी बाध्य भयौ ।’

२०७४ को निर्वाचनमा आरजु एमाले उम्मेदवार नारदमुनी रानासँग ४ हजार ८८० मतले पराजित भएकी थिइन् । यसपटक धनगढीको मेयरमासमेत स्वतन्त्र उम्मेदवार गोपाल हमालले जितेका छन् । हमालले ओझाले उम्मेदवार दिएमा उनलाई सघाउने बचन दिइसकेको बताइन्छ ।

नेता भण्डारीको भनाइमा २०७४ मा असहयोग गरेको भन्दै कांग्रेसले कारबाही गरेका पुष्करनाथ ओझा आरजुका यसपटक ठूलो चुनौतीका रूपमा अउने छन् । ओझासँग कांग्रेसका जिल्लादेखि केन्द्रीय नेताले विभिन्न चरणमा छलफल गर्दासमेत उनले कैलाली–५ आरजुलाई कुनैपनि हालतमा नछोड्ने बताउँदै आएका छन् । ओझा असहयोग नै आरजुलाई पराजय गराउनका लागि काफी भएको स्थानीय नेताहरु बताउँछन् ।

२०७४ को निर्वाचनमा राणालाई ‘टुरिस्ट’ उम्मेदवार भएको आरोप लगाइएको थियो । त्यसपछि राणाले धनगढीमा घरसमेत खरिद गरेकी थिइन् । २०७४ को निर्वाचनमा राणालाई हराउन भूमिका खेलेको भन्दै कैलाली कांग्रेसका पुराना नेता पुष्करनाथ ओझालाई कांग्रेसले अनुशासनको डन्डा बर्साएपछि बूढानीलकण्ठसँग बदला लिने असन्तुष्टहरूको संख्या कैलाली—५ मा दिनानुदिन बढिरहेको बताइन्छ ।

आरजुका लागि अर्को खतरा भनेको धनगढीमा डोटेलीहरुको बाहुल्यता छ । पुर्खयौली घर डोटी भएकाहरूको बाहुल्य भएकाले डोटी नै पुर्खयौली घर भएका कैलाली कांग्रेसका पुराना नेता ओझा आरजुबिरुद्ध हुँदा सबै डोटेलीहरु पनि उनीबिरुद्ध नै देखिएका छन् ।

स्थानीयहरुका अनुसार धनगढीलाई जनताको भावना बुझ्ने विकासप्रेमी नेता चाहिएको छ । त्यसका लागि आरजु उपयुक्त पात्र भएपनि उनले देखाएको अहंमता र पार्टीका नेताहरुको समीकरण मिलाउन देउखाएको उदासिनताले चुनाव जित्न सहज छैन र फेरी पनि कांग्रेसले यो क्षेत्र गुमाउने सम्भावना प्रवल छ ।

अर्को २०७४ को निर्वाचनमा जेलबाटै उम्मेदवारी दर्ता गराएर चुनाव लडेका लक्ष्मण थारु यसपटक खुला रूपमा निर्वाचन लड्दैन् ।जसकारण पनि आरजुलाई निर्वाचन जित्न सजिलो छैन । नेकपा एमालेले कैलाली–५बाट नारदमुनि राना नै दोहोर्याने तयारी गरेको छ । यदि नारदमुनि राना पुनः प्रतिनिधिसभाको निर्वाचनमा दोहोरिएमा आरजुलाई कैलाली –५ फलामको चिउरा सरह हुने निश्चित छ ।