मोरङ ४ मा टिकटका लागि त्रिकोणात्मक प्रतिस्पर्धा, केन्द्रमा आचार्यभन्दा घिमिरेकै पल्ला भारी

१७ भदौ, काठमाडौं । मोरङ जिल्लामा उम्मेदवार सिफारिसका कारण नेपाली कांग्रेसभित्र गरमागरम राजनीति चलिरहेको छ । मोरङको क्षेत्र न. ३ र ४ बाहेक अहिलेसम्म अरु निर्वाचन क्षेत्रबाट नाम सिफारिस हुन सकिरहेको छैन् । क्षेत्र न. ३ बाट सुनिल शर्मा एकल सिफारिस भइसकेका छन भने क्षेत्र न. ४ मा टिकटको दावी गरेका पाँचै जनाको नाम सिफारिस गरेर पठाइएको छ ।

मोरङ-४ मा सिफारिस भएका मध्ये कसले बाजी मार्ला भन्ने चर्चा यतिबेला केन्द्रमै पनि चलिरहेको छ । संस्थापनइतर पक्षका नेता डा. शेखर कोइरालाको गृह जिल्ला भएकाले पनि यो क्षेत्र चर्चामा छ । टिकटका मूख्य दुई दावेदार पनि संस्थापन इतर पक्षकै छन् । संस्थापन पक्षले थोरै गडबडी गरेमात्रै पनि यो क्षेत्रबाट महेश आचार्य र गुरु घिमिरेको हातबाट टिकट फुत्कन सक्ने सम्भावना पनि उत्तिकै छ ।

नेपाली कांग्रेसले भदौ २० गतेभित्र प्रदेश र प्रतिनिधिसभामा उम्मेदवार बन्न चाहनेहरुको नाम सिफारिस गर्न परिपत्र गरेका कारण पनि मोरङ कांग्रेसलाई बाँकी निर्वाचन क्षेत्रबाट नेता मिलाएर नाम सिफारिस गर्नुपर्ने चटारो छ । उम्मेदवार बन्न चाहने पाँच जनाको नाम सिफरिस भएकाले यतिबेला मोरङ-४ निकै चर्चामा छ ।

पूर्वअर्थमन्त्रीसमेत रहेका कांग्रेस नेता महेश आचार्य उठ्दै आएको मोरङको निर्वाचन क्षेत्र नम्बर ४ मा यसपटक अन्य चारजना युवा नेताले उनलाई चुनौती दिएका छन् । प्रतिनिधिसभा सदस्य उम्मेदवारका लागि पार्टीको क्षेत्रीय समितिले आचार्य र अन्य चार युवा नेताहरू गरी पाँचजनाको नाम सिफारिस गरिदिएको छ । महेश आचार्य, गुरुराज घिमिरे, भीम पराजुली, अमृत अर्याल र दिलिप गच्छदार सिफारिसमा परेका छन् ।

पाँच जनाको नाम सिफारिस भएपनि केन्द्रमा टिकट पाउनेमा आचार्य र घिमिरेकै चर्चा बढी छ । आयार्यले सुरुदेखि नै सोही क्षेत्र ओगटी राखेको भन्दै यसपटक आचार्यलाई नभएर घिमिरेलाई केन्द्रबाट टिकट दिने पक्षमा देखिएको छ । सिफारिस अगाडी नै आचार्यलाई केन्द्र र जिल्ला तहबाटै पनि समानुपातिमा बस्न आग्रह गरिएको थियो । तर, उनले प्रत्यक्षमा नै लड्ने जाँगर देखाएका छन् ।

क्षेत्र न. ४ का स्थानीय कार्यकर्ता पनि आचार्यलाई भन्दा घिमिरेलाई नै बढी रुचाउँछन् । घिमिरेले अहिलेसम्म लाभको कुनैपनि पद नपाएकाले यो पटक उनलाई अवसर दिनुपर्छ भन्ने आवाज केन्द्रमै पनि अचार्यको भन्दा घिमिरेको नै बलियो देखिएको छ । उनी सँगसँगै अमृत अर्याललाई टिकट पाउनेमा काम आँक्न सकिने अवस्था छैन् । गठबन्धन भएका कारण सो क्षेत्रमा माओवादीले दावी पनि गरिरहेको छ । ०७४ मा यस क्षेत्रबाट नेकपा माओवादीका अमनलाल मोदीले जितेको क्षेत्र हो यो ।

उनी अहिलेपनि प्रचारप्रसारमा जुटिरहेका छन् । कांग्रेसमा किचलो हुने अवस्था आएमा यो क्षेत्र माओवादीको हातमा जाने सम्भावना पनि उत्तिकै छ । यता, घिमिरे र आचार्यबीचमा सहमति नभए पार्टी सभापति शेरबहादुर देउवा निकट मानिएका अमृत अर्यालले टिकट उछिट्याउने सम्भावनालाई पनि नकार्न सकिने देखिदैन् ।

यस क्षेत्रका स्थानीय र कार्यकर्ताकाे भनाइ अनुसार कांग्रेसकै भागमा टिकट पर्दा सबैभन्दा बलिया उम्मेदवार भनेका घिमिरे नै हुन् । आचार्य लामो समयदेखि यस क्षेत्रमा रहेपनि उनी बीचमा केही समय निष्क्रिय जस्तै बसेका थिए । मोरङ-४ भित्र पर्ने बेलबारी नगरपालिकाका ३ वटा वडा यस क्षेत्रमा पर्छन् । यस्तै ग्रामथानका ७ वटा वडा, कटहरीका ७ वटा वडा र विरागनगर महानगरका ६ वटा वडा यो क्षत्रमा पर्दछन् । यसमा अचार्यको भन्दा घिमिरेकै पहुँच बलियो देखिन्छ ।

समानुपातिकमा सुरक्षित बस्न नचाहेका कांग्रेस नेता आचार्यको दाबी केन्द्रले पुष्टि नगरेमा उनी संसद छिर्न नपाउने अवस्थामा छन् । बारम्बार आचार्यमात्रै सो क्षेत्रबाट लडिरहँदा नयाँलाई अवसर दिन नचाहेको आरोप उनीमाथि त लाग्ने नै छ । घिमिरेले टिकट नपाउँदा पार्टीभित्र अन्तरकलहको स्थिति आउने सम्भावना पनि देखिन्छ । सिफरिसमा परेका गच्छदार र पराजुलीको दावीलाई पनि काम आँक्न मिल्दैन् ।

लामो समय पार्टीका लागि खर्चिएका घिमिरे टिकट पाउँदा पराजुली र गच्छदारले आफ्नो दावीलाई स्वभाविक रुपमा लिनसक्ने देखिएको छ भने आचार्यले टिकट पाएमा चारै जनाले आफ्नो दावीलाई सहजै स्वीकार गर्ने अवस्था देखिदैन् । जसले गर्दा टिकट पाएपनि अन्तरघातका कारण आचार्य पराजित हुने प्रबल सम्भावना रहेको स्थानीय नेता तथा कार्यकर्ताहरु बताउँछन् ।