उपसभामुख भुसालको टिकटबारे पार्टीमा छलफल, अर्घाखाँचीबाट उम्मेदवारी दिने तयारी

भदौ १८, अर्घाखाँची । उपसभामुख तथा नेपाली कांग्रेसकी नेत्री पुष्पा भुसालले आगामी प्रतिनिधिसभा निर्वाचनमा प्रत्यक्षतर्फ उम्मेदवारी दिने इच्छा देखाएपनि यसबारे पार्टीकमा समेत छलफल भएको छ । २०७४ को निर्वाचनमा समानुपातिकबाट निर्वाचित भुसालले यसपटक प्रत्यक्षबाट लड्ने मनसाय देखिएकी छन् ।
उनले अर्घाखाँचीबाट उम्मेदवार बन्ने भन्दै अहिले गृह जिल्ला पुगेकी छन् । तर, पार्टीले भने अहिले उनलाई कुनै संकेत दिएको छैन् । उपसभामुखमा निर्वाचित भएपछि पहिलोपटक गृहजिल्ला पुगेकी भुसालले जिल्लाबाट प्रत्यक्ष निर्वाचनको लागि आफूले इच्छा जाहेर गरेको र पार्टीमासमेत आफुले कुरा राखेको बताएकी छन् ।

युवाहरुलाई अवसर दिने बहानामा पुरानालाई निषेधको राजनीति गरिनु नहुने भुसालको भनाइ छ । ’हो नयाँलाई ठाउँ दिनुपर्छ भन्दाभन्दै पुरानालाई निषेध गर्नुहुदैन’, भुसालले भनिन ’नयाले अवसर पाउनुपर्छ भन्दैगर्दा पुरानाले राजनीतिक इच्छा राख्नु स्वाभाविक हो । उनीहरुको अधिकार कुण्ठीत गरिनुहुदैन ।’

टिकट पाउने नपाउने पार्टीको हातमा रहेको भन्दै उपसभामुख भुसालले टिकट पाउनेमा आफु विस्वस्त रहेको बताइन । ’पार्टीले टिकट दिनेमा विस्वस्त छु, दिएनछ भने जसले टिकट पाउनुहुन्छ उहाँलाई सहयोग गरेर अगाडी बढ्न तयार छु ।’ भुसालले भनिन ।

नेपाल पत्रकार महासंघ अर्घाखाँची शाखाले भुसालको सम्मानमा आयोजना गरेको कार्यक्रममा नेतृ भुसालले गठबन्धनले सिटको बाँडफाँडको अन्तिम टुंगो लगाउने बताइन् ।