गठबन्धनको निर्देशन अनुसार कार्यदलको बैठक बस्दै, सिट बाँडफाँटको अन्तिम टुंगो लगाउने

२१ भदौ, काठमाडौं ।  सोमबार बसेको सत्ता गठबन्धनको बैठकले क्षेत्रको अवस्था हेरेर सीट बाँडफाँडको टुंगोलगाउन निर्देशन दिएपछि सोही अनुसार काम गर्न कार्यदलको बैठक आज बस्दैछ । सत्ता गठबन्धनमा सिट बाँडफाँटका लागि गठित कार्यदलले आज सहमति जुटाउने दाबी गरेको छ ।

हिजो बसेको बैठक बिना निष्कर्ष टुंगिएपछि आज पुनः बैठक बस्दै छ । आजको बैठकले जसरी पनि सिट बाँडफाँट टुंगो लगाउने दाबी कार्यदलका सदस्यहरुले गरेका छन् । सञ्चारमन्त्री तथा सरकारका प्रवक्ता ज्ञानेन्द्रबहादुर कार्कीका अनुसार हिजोको बैठकमा १६५ वटै निर्वाचन क्षेत्रमा दलहरूको अवस्थाबारे छलफल भएको थियो ।

उनले भने, ‘शीर्ष तहबाट जुन जिम्मेवारी कार्यदललाई दिइएको छ, त्यसअनुसार हामीले सरसरती १६५ निर्वाचन क्षेत्रमा कसको के पोजिसन छ, त्यसबारे छलफल गरेका छौँ । आज फेरि हामी त्यो छलफललाई निरन्तरता दिँदै बैठक बस्छौँ ।

उनले कार्यदललाई दिएको जिम्मेवारी पूर्ण वहन गरेर नेतृत्वलाई प्रतिवेदन बुझाउने सहमतिका साथ आज बैठक बस्न लागेको बताए । १६५ सिटमा नै आज मुलरूपमा गृहकार्य हुने उनको भनाइ छ ।