घनश्याम भूसाललाई एउटा मात्रै क्षेत्रबाट सिफारिस गराउन जिल्ला नेतृत्वलाई ओलीको दवाव

२१ भदौ, काठमाडौं । नेकपा एमालेका नेता घनश्याम भूसालको नाम आसन्न प्रतिनिधिसभा निर्वाचनका लागि रुपन्देहीका दुई वटा निर्वाचन क्षेत्रबाट सिफारिस भएपछि त्यसलाई सच्याउन जिल्ला नेतृत्वलाई दवाव परेको छ । एमाले अध्यक्ष केपी शर्मा ओलीले जिल्लालाई दवाव दिएको नेताहरुको भनाइ छ ।

जिल्लाको क्षेत्र नम्बर १ र ३ बाट भुसालको नाम क्षेत्रीय कमिटीबाट सिफारिस भई जिल्ला कमिटीमा पुगेको छ । भूसालको घर क्षेत्र नं. १ मा पर्ने भए पनि उनी क्षेत्र नम्बर ३ बाट पनि सिफारिसमा परेका थिए । उनलई एक क्षेत्रबाट मात्रै सिफरिस गर्न पार्टी अध्यक्ष ओलीको दवाव गएको छ । क्षेत्र नम्बर ३ बाट भूसालसँगै स्थानीय नेताहरु बासुदेव घिमिरे, दुर्गा भुसाल र पूर्वसांसद यज्ञजित शाहको नाम सिफारिस भएको छ ।

अघिल्लो चुनावमा क्षेत्र नम्बर ३ बाट टिकट पाएका भूसालले तत्कालीन स्वास्थ्यमन्त्री एवम् राप्रपाका नेता दीपक बोहोरालाई हराएका थिए । जिल्लाका केही नेताहरुले भूसालको नाम फेरि पनि क्षेत्र नम्बर ३ बाट मात्रै सिफारिस गर्ने गरि छलफल अगाडि बढाएपछि विवाद भएको भएको थियो । गृहक्षेत्रका स्थानीय नेता–कार्यकर्ताहरूले भूसाललाई १ नम्बर क्षेत्रमै उठाउनुपर्ने अडान लिएर केन्द्रमा गुनासो राखेपनि ओलीले जिल्लालाई दवाव दिएको बताइन्छ ।