गठबन्धनमा कांग्रेसलाई ८० सीट दिने र बाँकी अरुले लिएर मिलाउने प्रयास भइरहेको छः प्रचण्ड

२१ भदौ, काठमाडौं ।  नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सत्तारुढ गठबन्धनमा नेपाली कांग्रेसलाई ८० सीट दिएर बाँकिरहेका सीट अरु दलले लिएर मिलाउने प्रयास भइरहेको बताएका छन् । उनले नेकपा माओवादीले ६० सीट दावी गरेको र यसैको वरपर सहमति हुँने बताएका छन् ।

सुदूरपश्चिम प्रदेशको राजधानी धनगढी कैलालीमा पार्टी कार्यक्रमका लागि पुगेका प्रचण्डले मंगलबार विमानस्थलमा पत्रकारहरुसँग कुरागर्दै आज साँझसम्म कार्यदल स्तरबाट सहमतिको प्रयास हुने र बुधबार शीर्ष नेताहरूको बैठकबाट टुंगो लगाइने बताए ।

उनले कांग्रेसले १०० सीट मागिरहेपनि ८० सीटको वरिपरी आउने सम्भावना देखिएको भन्दै माओवादीले ६० भनेको र यसको वरिपरी मिलाउने प्रयासमा गठबन्धनका नेताहरु रहेको बताए । एकीकृत समाजवादी २५ र जसपा २५ दाबी गरिराखेको भन्दै प्रचण्डले यसैलाई आधार बनाएर सबै पार्टीका प्रतिनिधि बसेर प्रतिनिधिसभा निर्वाचन क्षेत्र र प्रदेश निर्वाचन क्षेत्रसम्म टुंगो लगाउने दावी गरे ।

मिलेको जति मिलाउने र त्यसपछि शीर्ष तहमा बसेर टुंगो लगाउने कुरा भइरहेको उनको भनाइ छ । संघीय र प्रदेशका सबै निर्वाचन क्षेत्रको टुंगो शीर्ष तहबाट नै लगाउने गरी काम भइरहेको उनले जानकारी दिए । प्रचण्डले गठबन्धनमा सिटसंख्या क्षेत्र र प्रदेश एकैपटक टुंग्याउने भनेर सबै पार्टीका प्रतिनिधिलाई आज बेलुकासम्मको समय दिइएको बताए ।

भोलि बुधबार शीर्ष नेताहरूको बैठकबाट टुंगो लगाउने कुरा भएको भन्दै उनले सबै पार्टीले गरेका दाबी सुन्ने र पछि शीर्ष तहबाट टुंगो लगाउने गरी काम भइरहेको जानकार दिए । कांग्रेसमा शेखर कोइराला पक्षले १०० सिट आफ्नो पार्टीलाई हुनुपर्ने माग गरेको पनि उनले बताए ।

स्थानीय तहको निर्वाचन सफलतापूर्वक सम्पन्न भएको र आगामी मंसिर ४ का लागि तोकिएको संघ र प्रदेश निर्वाचन पनि सम्पन्न गर्नुपर्ने दाहालको भनाइ थियो । ’गतवर्ष संविधान मिचिने, च्यातिने हो कि भन्ने खतरा थियो । यो निर्वाचन सम्पन्न भएपछि त्यो खतरा नेपालबाट टरेर जान्छ,’ उनले भने ।

त्यस्तै, प्रतिनिधिसभा र प्रदेश सभाको कार्यकाल मनोनयनको अघिल्लो दिनसम्म रहने कुरामा सरकार र सत्तारुढ गठबन्धन स्पष्ट रहेको दाहालको भनाइ थियो । प्रतिनिधिसभामा संसद्को कार्यकाल लम्ब्याउने व्यवस्थासहितको कानुन संशोधन विधेयक ल्याएकोमा दाहालले त्यसो नगरिने बताए ।