निर्वाचनको सम्मुखमा एक दर्जनबढी सिडियोको सरुवा, को कहाँ पुगे ?

२२ भदौ, काठमाडौं । गृह मन्त्रालयले निर्वाचनको सम्मुखमा महत्वपूर्ण जिल्लाका प्रमुख जिल्ला अधिकारी ‘सिडियो’ हरुको सरुवा गरेको छ । निर्वाचन आयोगले असोज १ गतेदेखि लागु हुने गरी निर्वाचन आचारसंहिता लगाउने तयारी गरेपछि मन्त्रालयले त्यसअघि नै आफू अनुकुलका सिडियोहरु सरुवा गरेको हो ।  सरुवा गर्दा काठमाडौँ उपत्यकासहित प्रमुख जिल्ला अधिकारीको सरुवा भएको छ ।

मंगलबार साँझ गरिएको सरुवामा काठमाडौंको प्रमुख जिल्ला अधिकारीमा ललितपुरका प्रजिअ घनश्याम उपाध्यायको सरुवा भएको छ काठमाडौँका सिडिओलाई गोविन्द रिजाललाई गृह मन्त्रालयको कर्मचारी प्रशासन महाशाखा प्रमुखमा सरुवा गरिएको छ ।

उनी पहिलो पनि सोही महाशाखामा थिए । ललितपुरमा कास्कीका प्रमुख जिल्ला अधिकारी जयनारायण आचार्यलाई ल्याइएको छ । कास्कीमा गृह मन्त्रालयका प्रशासन महाशाखा प्रमुख टेकबहादुर केसीलाई पठाइएको छ । जुम्लाकी प्रजिअ विजया कुमारी प्रसाईँ मन्त्रालय ल्याइएको छ भने जुम्लाको प्रजिअमा मुकेशकुमार केसरीलाई सरुवा गरिएको छ ।

दैलेखको प्रजिअमा गोगनबहादुर हमाललाई पठाइएको छ भने दैलेखका हरि प्याकुरेललाई बाँकेको सहायक प्रमुख जिल्ला अधिकारीमा पठाइएको छ । सूचना विभागको महानिर्देशक रहेका हमाल केही समयअघि गृह मन्त्रालयमा सरुवा गरिएको थियो ।

यस्तै बाँकेका सहायक प्रमुख जिल्ला अधिकारी टोपेन्द्र बहादुर केसीलाई इलाका प्रशासन कार्यालय सिमरा सरुवा गरिएको छ भने पाँचथरका प्रजिअ सुरेश न्यौपानेलाई मन्त्रालय र पाँचथर को प्रजिअमा गणेश गैरेलाई पठाइएको छ ।

संखुवासभाका प्रजिअ नुरहरी खतिवडालाई सप्तरीको प्रजिअमा, सप्तरीका प्रजिअ जनार्दन गौतमलाई उदयपुरको प्रजिअ र उदयपुरका वीरेन्द्र यादवलाई संखुवासभाको प्रजिअमा सरुवा गरिएको गरिएको छ । सरुवा यो सूचना मन्त्रालयले औपचारिक रुपमा सार्वजनिक गरिसकेको छैन । केही दिनपछि अन्य जिल्लाका सिडियोहरु पनि सरुवाको तयारी भैरहेको मन्त्रालयल स्रोतले जनाएको छ ।