सार्वजनिक मञ्चमै जनार्दन र प्रचण्डबीच घोचाघोच, हुर्काएर यहाँसम्म ल्याएको गुन नबिर्सन दाहालको शर्मालाई चेतावनी

२२ भदौ, काठमाडौं । नेकपा माओवादीका अध्यक्ष पुष्पकमल दाहाल ‘प्रचण्ड’ र नेता जनार्दन शर्माबीच सार्वजनिक मञ्चमै भनाभन भएको छ । पार्टीको महासचिव दावी गरिरहेका जनार्दन शर्मालाई अध्यक्ष प्रचण्डले उपमहासचिव पद दिएपछि यसै विषयलाई लिएर दुई नेताबीच घोचाघोच चलेको हो ।

अध्यक्ष प्रचण्ड र नेता शर्माबीच सार्वजनिक मञ्चमै देखिएको यस्तो व्यवहारले नेकपा माओवादी केन्द्रको आठौँ राष्ट्रिय महाधिवेशनपछि भएको पदाधिकारी चयनको विवादलाई छताछुल्ल बनाएको छ । अध्यक्ष प्रचण्डले दिएको उपमहासचिव पद शर्माले मञ्चबाटै अस्वीकार गरेका छन् । यसैक्रममा प्रचण्डले शर्मातर्फ इशारा गर्दै ‘तपाईं मैले नै हुर्काएको व्यक्ति हुँ भन्ने नबिर्सनु’ भन्दै चेतावनीसमेत दिएका छन् ।

बुधबार काठमाडौंमा अनेरास्ववियु क्रान्तिकारीको ‘क्रान्तिकारी फोर्स’ घोषणा कार्यक्रममा जनार्दनले आफू उपमहासचिवका रूपमा नभई संगठन विभाग प्रमुखको हैसियतमा उपस्थित भएको भन्दै पद अस्वीकार गरेका थिए । प्रचण्ड उपस्थित मञ्चमै जनार्दनले आफू उपमहासचिवको हैसियतमा नभई कार्यकर्ताका रूपमा कार्यक्रममा आएको दोहोर्याएका थिए ।

यसअघि माओवादीमा जनार्दन र वर्षमान पुन दुवै महासचिवका दाबेदार थिए । तर, प्रचण्डले यही भदौ ४ गते देव गुरुङलाई महासचिव बनाएपछि शर्मा असन्तुष्ट बनेका थिए । प्रचण्डले जनार्दन र वर्षमानसहित गिरिराजमणि पोखरेल, हरिबोल गजुरेल, पम्फा भुसाल, शक्ति बस्नेत र मात्रिका यादवलाई उपमहासचिव तोकेका थिए । अध्यक्षले लिएको निर्णयमा त्यस बेलै फरक मत राखेका जनार्दनले कार्यक्रमको मञ्चबाटै उक्त पद आफुलाई अयोग्य भएको बताए ।

प्रचण्डतर्फ संकेत गर्दै शर्माले कार्यकताहरुलाई आफुले संगठन विभाग प्रमुखको हैसियतले सम्बोधन गरेको जानकारी गराउन चाहन्छु भन्दै पार्टीमा ६ जना उपमहासचिव रहेको तर, आफुले उपमहासचिव पदको हैसियतमा सम्बोधन नगरेको बताए । माओवादी केन्द्रमा संगठन विभागको नेतृत्वमा महासचिव नै हुने प्रचलन छ । तर, उनले आफु नै संगठन विभागको प्रमुख भएको दावी गरे । शर्माले आफू अध्यक्ष प्रचण्डको सबैभन्दा कडा आलोचक र सबैभन्दा ठूलो रक्षक पनि भएको बताए ।

कार्यक्रमलाई सम्बोधन गर्ने क्रममा अध्यक्ष प्रचण्डले आफूले पार्टीमा राम्रो उत्तराधिकारी तयार होऊन् भन्ने चाहेको बताउँदै नेताहरूको रक्षा गर्ने र हुर्काउन पनि आफूले नै मुख्य भूमिका खेलेको बताए । उनले जनार्दन शर्मालाई पनि आफुले नै हुर्काएर यहाँसम्म ल्याएको भन्दै शर्मालाई धरातल नभुल्न चेतावनी दिए । प्रचण्डले भने, ‘जनार्दनले जाँदाजाँदै भन्नुभयो नीति र नेतृत्वको रक्षाको कुरा, जनार्दनलाई रक्षा गर्न र हुर्काउन पनि प्रचण्डको मुख्य भूमिका हो ।’

उनले अब आफ्नो सपना राम्रो उत्तराधिकारी तयार गर्ने र उनीहरुले पार्टीलाई एकताबद्ध गरेर मजबुद बनाउन भन्ने रहेको बताए । अब आउने नेताहरुले तमाम क्रान्तिकारीलाई सही स्कुलिङ गरेर माओवादीको विरासत र क्रान्तिकारी परम्परालाई अगाडि बढाएर पार्टीलाई देशका अरु पाटी भन्दा शक्तिसाली बनाउन सकनु भन्ने आफ्नाे धारणा रहेको प्रचण्डले बताए ।