जनतामाझ गर्बिलो इतिहास बनाएको कांग्रेस रामराम भन्ने अवस्थामा आउनु लोकतन्त्रकै दुखद पक्ष होः पूर्वराष्ट्रपति

२३ भदौ, काठमाडौं ।  पूर्वराष्ट्रपति डा. रामबरण यादवले नेपालको लोकतान्त्रिक आन्दोलनको अगुवा गर्दै जनतामाझ गर्बिलो इतिहास बनाएको नेपाली कांग्रेस अहिले एक्लै जनतामा जान नसक्ने अवस्थामा आइपुगेको टिप्पणी गरेका छन् । उनले नेताहरुकै कारण नेपाली कांग्रेस रामराम भनेर अरुले काँध थापिदिनुपर्ने आवस्थामा आइपुग्नु नेपालका लागि दुखद पक्ष भएको बताए ।

विचार नमिल्ने शक्तिसंग कांग्रेसले गरेको चुनावी तालमेलप्रति संकेत गर्दै डा. यादवले अहिले जनताको माझमा जान कांग्रेसले अंशबन्डा गरिरहेको गुनासो गरे । आउँदो ४ मंसिरमा हुने प्रतिनिधिसभा र प्रदेशसभा सदस्य निर्वाचनका लागि माओवादी केन्न्द्र, एकीकृत समाजवादीसहितका दलसँग कांग्रेसले गठबन्धन गर्नु समय सपेक्ष नभएको उनको भनाइ छ ।

काठमाडौं बिहीबार आयोजित बिपी साहित्य सम्मान एवं बिपी सेनानी सम्मान तथा स्मृति लोकार्पण कार्यक्रमलाई सम्बोधन गर्दै उनले गर्विलो इतिहास बोकेको कांग्रेस जनतामाझ जान अहिले अंशबन्डा गर्नुपर्ने अवस्थामा आइपुगेको र यो अवस्थामा कांग्रेसलाई पर्काउन गतिलो र निडर नेताको आवश्यकता भएको बताए ।

यादवले कांग्रेसमा बिपी कोइराला, गणेशमान सिंह, कृष्णप्रसाद भट्टराई, गरिजाप्रसाद कोइरालाजस्ता महापुरुषको नाम सुन्दै गद्गद् हुने कांग्रेस अहिले त्यस्तो पुर्खा भएर पनि जनातमाझ जान डराइरहेको बताए । उनले कांग्रेसले आफ्ना नीति र विचारलाई सही ढंगले परिचालित गरे जनतामा जान र चुनाव चित्न कसैको सहारा नचाहिने दावी गरे ।

कांग्रेसको अहिलेको अवस्थालाई रामराम भन्ने बेला भइसकेको भन्दै उनले भने, ‘जनताको बीचमा जान पनि अरु पार्टीसँग मिलेर भागबण्डा गरिरहेको छ । यसले कांग्रेसको बारेमा राम, राम भन्ने बेला भइसकेको देखाउँछ जनतामाझ जान अंशबन्डा गर्नु लज्जाको विषय हो । कांग्रेसलाई फर्काउन अब सहज छैन । ठूलै आँट र साहस भएको नेता जन्मिएन भने कांग्रेससँगै लोकतन्त्र पनि ठूब्छ ।’

कांग्रेसभित्र पन विधि र आदर्शको कुरा हुन छाडेको र चुनावमा टिकटसमेत बिक्री हुन थालेको भन्दै कांग्रेसका पूर्वमहामन्त्री समेत रहेका डा. यादवले कांग्रेसमा पसिना बगाउनेको भन्दा पैसा दिएर टिकट किन्नेको मूल्यांकन बढ्दै गइरहेको भन्दै चिन्ता व्यक्त गरे । कांग्रेसका तत्कालीन नेता रहेका उनी पहिलो जननिर्वाचित राष्ट्रपति हुन् ।