उपयोगहीन बन्यो कांग्रेसको अभियान, पार्टीको नीति र कार्यक्रभन्दा गालीगलोजमै वित्यो १५ दिन

२५ भदौ, काठमाठौं । आगामी निर्वाचनमा पार्टीका नीति र कार्यक्रमबारे जनतालाई जानकारी गराउन र जनताका गुनासो सुनेर केन्द्रमा त्यसकाे समीक्षा गर्ने भन्दै नेपाली कांग्रेसले सुरु गरेको ‘जनताको साथमा कांग्रेस’ अभियान अन्ततः उपयोगहीन देखिएको छ ।

चुनावी प्रचार अभियानकै रुपमा अगाडि बढाइएको यो कार्यक्रमले काग्रेसभित्र थप असन्तुष्टि बढाउने काम मात्रै गरेको छ । केन्द्रले प्रचार अभियानमा खटाएका नेता तथा कार्यकर्ताहरुले कांग्रेसका कुरा जनतालाई सुनाउनेभन्दा एकले अर्कालाई आरोप लगाउने र आफु कसरी उम्मेदवारका लागि सिफारिसमा पर्ने भन्नेमै १५ दिन बितेको छ ।

आगामी मंसिर ४ मा हुने प्रदेश र प्रतिनिधिसभा निर्वाचनलाई केन्द्रित गरेर नेपाली कांग्रेसले भदौ १० गतेदेखि सञ्चालन गरेको १५ दिने अभियान शुक्रबार सम्पन्न भएको छ । जनतालाई आफ्ना कुरा सुनाउने र जनताका कुरा सुन्ने भन्दै सुरु गरिएको अभियानले सामान्य औपचारिकतासमेत पुरा नगरेको कांग्रेसीहरु नै बताउँछन् ।

प्रचार अभियानमा खटिएका नेताहरूको ध्यान जनताको कुरा सुन्नेभन्दा पनि निर्वाचनमा कसरी उम्मेदवार बन्ने भन्नेतिर केन्द्रित रह्यो । पार्टीका कार्यक्रम र अजेन्डा लिएर जनतामाझ जानुपर्ने कांग्रेसका जिल्ला र प्रदेश तहका नेताहरूमध्ये विरलैले मात्र केन्द्रको निर्देशन मानेका छन् ।

धेरै जसोले अधिकांश समय केन्द्रीय कार्यालयको निर्देशनअनुसार प्रदेश र प्रतिनिधिसभामा आआफ्ना जिल्ला र क्षेत्रबाट प्रत्यक्ष र समानुपातिकको नाम सिफारिसमै केन्द्रित देखिए । आआफ्ना तहबाट नाम सिफारिस भएपछि जिल्ला तहका धैरैजसो नेताहरू केन्द्रीय नेता मिलाउन काठमाडौंमा सक्रिय भए ।

कांग्रेसले स्थानीय तह निर्वाचनमा पार्टीले खटाएका केन्द्रीय प्रतिनिधि धेरैजसो जिल्लामै नपुगेको र गएका पनि सदरमुकामबाटै फर्किएको भन्दै यसपटक कम्तीमा पाँच दिन तोकिएको ठाउँमा बस्नुपर्ने भनेको थियो ।

केन्द्रीय प्रतिनिधिलाई निर्वाचन क्षेत्रका कार्यक्रममा सहभागी हुनुका साथै गठबन्धनमा रहेका दलहरूबीच जिल्लामा समन्वय र सहकार्यको स्थिति मूल्यांकन गरी सहजीकरण गर्न पनि निर्देशन थियो । तर, गाउँ पुगेका नेताहरुले गठबन्धनलाई सघाउ पुग्ने भन्दा विगार्ने काम नै बढी गरेका छन् ।

निर्वाचनलाई लक्षित गर्दै कांग्रेसले ‘जनताका साथमा कांग्रेस’ नाम दिएर तीन चरणको अभियान सञ्चालन गर्ने निर्णय गरेको थियो । कांग्रेसले पहिलो चरणमा भदौ १० देखि २४ गते (बीपी जयन्ती) सम्म, दोस्रो चरणमा समानुपातिक उम्मेदवारी दर्तापछि र तेस्रो तथा निर्णायक चरणमा प्रत्यक्षतर्फ उम्मेदवारी दर्तापछि जनताको घरदैलोमा जाने निर्णय गरेको थियो ।

अभियानका क्रममा टोल कार्यसमितिकै ब्यानरमा कम्तीमा एउटा राजनीतिक, सामाजिक, मतदाता संवाद, विकास संवाद, युवा संवाद, महिला संवाद, दलित समुदाय संवाद कार्यक्रम गर्न कांग्रेसले निर्देशन दिएको थियो । तर, १५ दिनमा यी कुनैपनि काम हुन सकेनन् । जनतालाई बुझाउन भनेर राखिएको यो कार्यक्रममा न नेताले बुझाए न जनताले बुझ्न पाए ।