बहुमत ल्याउन कांग्रेसलाई सय सीट चाहिन्छ, ८५ सीटमा गठबन्धन गरेर पार्टीमा विद्रोह नगराऊँः कोइराला

२६ भदौ, विराटनगर । नेपाली कांग्रेसका वरिष्ठ नेता डा. शेखर कोइरालाले कांग्रेसले आगामी निर्वाचनमा एकल बहुमत ल्याउन नयाँ रणनीति तयार गरेर अगाडि बढ्नपर्ने बताएका छन् । उनले कांग्रेसलाई एकल बहुमतको सरकार बनाउन अहिले कम्तिमा पनि एक सय सीटभन्दा तल लिएर नपुग्ने बताएका छन् ।

कांग्रेसले कम्तिमा पनि प्रत्यक्षतर्फ सय सीटमा उम्मेदवारी दिएमात्रै एकल बहुमत आउन सक्ने भन्दै एकल बहुमत आउने गरी सीट नलिने भए गठबन्धन गरेर चुनावमा जानुको औचित्य नहुने र बेकारमा अन्य दलको भारीमात्रै बोक्नुपर्ने उनले बताए । गृहजिल्ला मोरङमा आइतबार आयोजित कार्यक्रममा कोइरालाले पार्टीको केन्द्रीय कार्य समिति बैठकले नै गठबन्धनबाट कांग्रेसको एकल बहुमत सुनिश्चित गर्ने गरी सीट लिने भनेकाले सोही अनुसार सीट बाँडफाँटको प्रयास भइरहेको दावी गरे ।

उनले सभापति शेरबहादुर देउवातर्फ संकेत गर्दै ८० देखि ८५ सीटमा उम्मेदवार दिएर कांग्रेसले बहुमत नल्याउने र उल्टै पार्टीमा विद्रोह हुने बताए । २०७४ सालमा कांग्रेस एक्लैले जितेका क्षेत्र छाड्न नसकिने बताउँदै यो विषयमा आफूले नेकपा माओवादीका अध्यक्ष प्रचण्डलाई पनि भनिसकेको बताए ।

कोइरालाले गठबन्धनमा रहेका केही दलहरु क्षमताभन्दा बढी सीटमा दावी गरेकाले सहमति हुन नसकेको दावी गरे । कोइरालाले कांग्रेसको गढमा गठबन्धनका नाममा अन्यलाई टिकट दिए पार्टीमा विद्रोह हुने बताए । कांग्रेस केन्द्रीय कार्य समितिले गरेको निर्णय सबै नेतालाई पालना गर्न आग्रह गर्दै उनले पार्टीले गठबन्धनमा चुनाव लडेर बहुमतको सरकार बनाउने निर्णयलाई कसैले पनि लत्याउन नमिल्ने बताए ।

कोइरालाले बहुमतको सरकार बनाउन र पार्टीमा विद्रोह हुन नदिन सय सीट कांग्रेसले पाउनुको विकल्प नरहेको दावी गर्दै गठबन्धनमा चुनाव लडेर जित सुनिश्चित हुने ठानेर अहिले उम्मेदवार बन्ने सूचीमा नाम लेखाउनेको भीड बढेको बताए । उनले गठबन्धनले कसैलाई जिताउँछ भन्नेमा कसैलाई पनि विश्वास नगर्न आग्रह गर्दै आफुलाई पनि विश्वास नभएको दावी गरे ।

कांग्रेसलाई युवा पार्टी बनाउन अवसरवादीहरूलाई यो निर्वाचनमा पाखा लगाउन उनको आग्रह थियो । पार्टी र विचार नबुझेका अवसरवादीहरू पैसाको बलमा अहिले सबै पार्टीमा हालिमुहाली जमाएको भन्दै कोइरालाले मोरङमा गुटगत राजनीति निकै चर्को भएकाे बताए । ३० वैशाखको स्थानीय चुनावमा पनि कांग्रेसको गुटगत राजनीतिको प्रभाव देखिएको र यसले प्रतिनिधिसभा निर्वाचनमा पनि अप्ठ्यारो पार्न सक्ने उनको ठम्याइ छ ।