सोल्टीमा राखिएको रात्रीभोजले सभामुख सापकोटालाई बनायो निल्नु न ओकल्नू !

२६ भदौ, काठमाडौं ।  भोली सोमबार चारदिने भ्रमणका लागि नेपाल आउन लागेका चिनियाँ जनकंग्रेसका अध्यक्ष ली झान्सुको टोलीलाई सम्मान दिन प्रतिनिधिसभाका सभामुख अग्निप्रसाद सापकोटालाई समस्या परेको छ । उनी अहिले यो धर्मसंकटबाट पार पाउने परामर्शमा व्यस्त छन् । चिनियाँ टोलीलाई सम्मान स्वरुप राखिएको रात्रीभोजको सबै तयारी पनि सकिएको छ ।

सभामुख सापकोटालाई चिनियाँ टोलीको सम्मान गर्न परेको समस्या भनेको शोक हो । शोक बारेको समयमा कुनै भोजभतेर गर्न नपाइने परम्परा छ । नेपाल सरकारले बेलायतकी महारानी एलिजाबेथ द्वितीयाको निधनमा तीन दिन शोक मनाउने घोषाणा गरिसकेको छ ।यसअनुसार सोमबार पनि शोक बार्नुपर्ने छ ।

देशले शोक मनाइरहेको बेला सभामुख अग्निप्रसाद सापकोटाले चिनियाँ जनकंग्रेसका अध्यक्ष ली झान्सुको सम्मानमा होटेल सोल्टीमा सोमबार साँझ रात्रीभोज आयोजना गरेका छन् । यो भोजको सबै तयारी भइसकेकाले अब के गर्ने भन्ने समस्याबाट निकास पाउनका लागि अहिले सापकोटाले अन्य विज्ञहरुसँग छलफल गरिहेको उनको निजी सचिवालयले जनाएको छ ।

सभामुख अग्नि सापकोटाको निमन्त्रणामा चिनियाँ जनकंग्रेसका अध्यक्ष ली सोमबारदेखि नेपाल भ्रमणमा आउँदै छन् । उनी राष्ट्रपति सी चिनफिङपछि दोस्रो मर्यादाका चिनियाँ नेता हुन् । महारानीको निधनमा सरकारले शोक मनाउने निर्णय गरेपछि शनिबारका लागि राखेको प्रतिनिधिसभाको बैठक चार दिनपछि सारिएको छ । सभामुख सापकोटाले शोककै कारण संसद बैठक स्थगित गरे पनि रात्रीभोज भने शोककै बीच गर्ने या नगर्ने भन्ने दोधारमा परेका छन् ।

सभामुखले नेतृत्व गरेको नेपाली प्रतिनिधिमण्डलको सोमबार साढे ५ बजे संघीय संसद भवनको ल्होत्से हलमा नेपाली प्रतिनिधिमण्डल र सी नेतृत्वको चिनियाँ प्रतिनिधिमण्डलबीच भेटवार्ता राखिएको छ । जसमा विघटित संविधानसभा अध्यक्षका रूपमा एमाले संसदीय दलका उपनेता सुवास नेम्वाङ पनि सहभागी हुनेछन् । साँझ ७ बजे होटेल सोल्टीमा रात्रीभोज आयोजना गरिएको छ ।

मन्त्रिपरिषद्को शनिबारको बैठकले नेपालभरिका सरकारी कार्यालय एवम् विदेशस्थित नेपाली दूतावास तथा नियोगहरूमा शनिबारदेखि तीन दिन राष्ट्रिय झण्डा आधा झुकाएर शोक व्यक्त गर्ने निर्णय गरेको छ । महारानीको निधन भएको भोलिपल्ट नेपालमा इन्द्रजात्रा परेको थियो । संयुक्त अधिराज्यमा सबैभन्दा लामो समय गद्दीमा रहेकी महारानी एलिजावेद द्वितीयाका बिहीबार राति स्कटल्याण्डको बाल्मोरलमा निधन भएको थियो ।