एमाले प्रवेशीलाई स्वागत गर्न मधेश पुगेका ओलीले पाए २०५ किलोको माला उपहार

२७ भदौ, काठमाडौं ।  विभिन्न पार्टीबाट एमालेमा प्रवेश गर्न चाहनेहरुलाई स्वागत गर्न मधेश पुगेका नेकपा एमालेका अध्यक्ष केपी शर्मा ओलीले २०५ किलोका माला उपहार पाएका छन् । यो वर्ष माला लगाउने नेताहरुमध्ये सबैभन्दा ठूला माला लगाउनेमा ओली परेका छन् ।

उनलाई जनकपुरधाममा २०५ किलोको मालाले स्वागत गरिएको छ । एमालेको जनकपुरधाम नगर कमिटीका पदाधिकारीले अध्यक्ष ओलीलाई २०५ किलोको फूलको मालाले स्वागत गरेका हुन् । सोमबार पार्टी प्रवेश गराउन जनकपुरधाम पुगेका ओलीलाई तिरहुतिया गाछीमा आयोजित कार्यक्रमका बीच माला लगाइएको हो ।

उक्त अवसरमा जनता समाजवादी पार्टी (जसपा) का प्रतिनिधि र प्रदेशसभा सदस्यहरु नेकपा एमालेमा प्रवेश गरेका थिए । प्रतिनिधिसभा सदस्य रुही नाज र प्रदेशसभा सदस्य अञ्जुकुमारी यादव एमाले प्रवेश गरेका हुन् । एमाले प्रवेश गरेका दुबै जसपाका केन्द्रीय सदस्य पनि हुन् ।

यस्तै, नेपाली कांग्रेसका पूर्व जिल्ला उपसभापति सन्तोष यादव, जसपाका केन्द्रीय सदस्य रामउदिन राम, शम्भु साह, पूर्व राज्यमन्त्री अरबिन्द साहसहितका पनि एमाले प्रवेश गरेका छन् । जनकपुरधाममा भएको कार्यक्रममा उनीहरु सबैलाई एमाले अध्यक्ष केपी शर्मा ओलीले माला तथा गम्छा लगाएर पार्टीमा स्वागत गरेका थिए ।