दिगो विकास लक्ष्य पुरा गर्न १९ अर्ब डलरको अवश्यकता, नेपाललाई चार वर्षभित्रमा विकासशील राष्ट्रमा पुर्याउने देउवा दावी

२९ भदौ,काठमाडौं ।  प्रधानमन्त्री शेरबहादुर देउवाले उनले नेपालको दिगो विकासका लक्ष्य पूरा गर्न १९ अर्ब डलर आवश्यकता पर्ने बताएका छन् । उनले नेपाललाई सन् २०२६ सम्ममा विकासशील राष्ट्रमा स्तरोन्नति गर्ने दावीसमेत गरेका छन् । यसका लागि निजि क्षेत्रले पनि लगानी बढाउनुपर्ने बबताएका छन् ।

बुधबार लगानी बोर्डको दिगो पूर्वाधार लगानी फोरमलाई सम्बोधन गर्दै प्रधानमन्त्री देउवाले पूर्वाधार विकास र आर्थिक स्तरोन्नति गर्दै सन् २०२६ सम्ममा विकासशील राष्ट्रमा नेपाललाई स्तरोन्नति गर्न सरकार लागिरहेको बताए । देउवाले वर्तमान सरकारले १५औं पञ्चवर्षीय योजनाअनुसार पूर्वाधार विकासलाई प्राथमिकता दिएर काम गरिरहेको दावी गरे ।

प्रधानमन्त्री देउवाले सन् २०४५ सम्म कार्बन उत्सर्जन शून्यमा झार्ने राष्ट्रिय नीति तथा योजना रहेको बताए । उनले त्यसका लागि निजी क्षेत्र तथा वैदेशिक लगानीकर्ताको सहयोगको आवश्यकता रहेको औंल्याउँदै मुलुकमा पूर्वाधार विकासमा निजी क्षेत्रको महत्वपूर्ण भूमिका रहेको भन्दै लगानी बढाउन आग्रह उद्योगीहरुलाई आग्रह गरे ।

देउवाले नेपालमा सार्वजनिक निजी साझेदारी मोडलमा ठूलो लगानी गर्न सकिने अवस्था रहेको भन्दै लगानी बोर्डले ३३ वटा आयोजनाका लागि ९ अर्ब डलर बराबरका योजना स्वीकृत गरेको र तीमध्ये २० वटा ठूला जलविद्युत् परियोजना रहेको जानकारी दिए ।

उनले भने, ‘सरकारले १५औं पञ्चवर्षीय योजनालाई प्राथमिकता दिएर पूर्वाधार विकासलाई प्राथमिकता दिएको छ । सरकारले राष्ट्रिय नीति बनाएर २०४५ सम्म कार्बन उत्सर्जन शून्यमा झार्ने योजना बनाएको छ । कोभिड महामारीका कारण दिगो विकासका लक्ष्य पूरा गर्न १९ अर्ब डलर आवश्यक रहेको छ । नेपाललाई २०२६ सम्म विकासशील राष्ट्रमा स्तरोन्नति गरी आर्थिक विकासमा सुधार गर्ने योजना रहेको छ ।

मुलुकमा पूर्वाधार विकास गर्न निजी क्षेत्रका लगानी महत्त्वपूर्ण रहन्छ भने वैदेशिक लगानी पनि आवश्यक भएकाले सबैलाई लगानी गर्न आग्रह छ । नेपालमा सार्वजनिक निजी साझेदारी मोडलमा ठूलो लगानी गर्ने सकिने छ । लगानी बोर्डले लगानीको क्षेत्रमा लगानी गर्ने लगानीकर्तालाई सहजता प्रदान गर्नेछ । लगानी बोर्डले ३३ वटा आयोजनाका लागि ९ अर्ब बराबरको डलरका ओजना स्वीकृत गरेको छ, जसमा २० वटा ठूला जलविद्युत् परियोजना रहेका छन् ।’