तराईमा बाढीको खतरा , लगातार २ दिनदेखिको वर्षाका कारण जनजीवन प्रभावित

♦दीपक शर्मा

३१ भदौ , बाँक । ४८ घन्टादेखि निरन्तर परिरहेको बर्षाका कारण बाँके बर्दियाको जनजीवन प्रभावित बनेको छ । लगातारको वर्षाका कारण खेतमा रहेको धानवालीलाई सहज भएपनि मकै, तरकारी लगायतका वालीलाई भने असर परेको छ ।

गएको बुधावारदेखि परिरहेको वर्षाका कारण नदी तथा खोलाहरुमा पानीको सतह बढिरहेको छ । बाँकेको राप्ती नदी ,डुडुवा खोला र मानखोलामा आजसम्म पानीको सतह सामान्य रहेको जिल्ला प्रशासन कार्यालय बाँकेका जिल्ला आपतकालिन कार्य संचालन केन्द्रका सुचना व्यवस्थापन अधिकृत रुपन ज्ञवालीले बताए ।

उनका अनुसार पानी बाँके तथा पहाडका जिल्लाहरु सुर्खेत, सल्यान ,दांग लगायतका जिल्लामा पनि परिरहेका कारण नदी तथा खोलाहरुमा पानीको सतह बढदै जाने बताए । यहि अवस्था केही घन्टा रहिरहने अवस्था आयो भने नदी तथा खोलामा पानीको सहत बढने हुँदा डुवान हुन सक्ने बताए ।

बर्दियामा पनि अविरल परेको वर्षाका कारण ववई तथा कर्णाली नदी र अन्य खोलाहरुमा पानीको सतह बढेको छ । पहाडमा पानी परिरहेका कारण नदीमा पानीको सतह पनि बढदै जाने भएको हुनाले अहिलेसम्म नदीमा पानीको सतह सामान्य देखिएको जिल्ला आपतकालिन कार्य संचालन केन्द्र बर्दियाका सूचना व्यवस्थापन अधिकृत विश्राम अधिकारीले बताए ।

नदी नाला तथा खहरे खोलाहरूमा पानीको सतह बढ्न भएको हुँदा सर्तकता अपनाउन आग्रह गरिएको छ । बर्षाका कारण दैनिक जनजीवन, यातायात क्षेत्र समेत प्रभावित बनेको छ । नदी तथा खोलामा पानीको सतह बढदै गएका बाँके र बर्दियाका अधिकांश भु भाग डुवानमा पर्ने छ ।