कञ्चनपुरको दोदा नदी बस्तीमा पस्यो, सयौँ बिगाह खेती डुवानमा

१ असोज, धनगढी ।  दोदा नदीको बाढी पस्दा कञ्चनपुरको लालझाँडी गाउँपालिकाका अधिकांश गाउँ र पुनर्वास नगरपालिकाका केही गाउँमा डुवान भएको छ । बाढीले लालझाडी गाउँपालिकाका सयौं बिगाह खेतीयोग्य जग्गा कटान गरिरहेको छ । दुई दिनदेखिको अविरल वर्षाका कारण शनिबार बिहान दोदा नदीको बहाव बढेपछि स्थानीय त्रसित बनेका छन् । बाढीका कारण बस्ती पूरै जोखिममा छ । स्थानीयवासी सुरक्षित वासस्थानको खोजीमा छन् ।

दोदा नदीमा पनि बाढी आएको छ । नदी भरिएपछि अनियन्त्रित भई खोलाको पानी गाउँबस्तीमा पसेको छ । लालझाडीको डुङा, बल्मी, भकुन्डा, कञ्जा, कसुवा, नन्दगाउँ, पर्सिया, जाई, देखतभूलीलगायत गाउँमा दोदा नदीमा आएको बाढीले स्थानीयलनई बिचल्ली बनाएको स्थानीय विश्राम रानाले जानकारी दिए । बाढीका कारण लालझाडी गाउँपालिकामा मात्र ६५ घर डुबानमा परेका छन् ।

दोदा नदीमा आएको बाढीले पुनर्वास नगरपालिका पनि प्रभावित बनेको छ । पुनर्वास नगरपालिका वडानम्बर ५ सिमरी, रातोखाल, पुनर्वास नगरपालिका १० चकमली क्षेत्र र पुनर्वास नगरपालिका ५ उदरी गाउँ ढुवानमा परेका छन् । अहिले स्थानीय सरकार, नेपाल प्रहरी, सशस्त्र प्रहरी र रेडक्रस उद्धारमा खटिएका छन् ।

गएराति दोदा नदीको बहाव बढेपछि आएको बाढीले सडक कटान गरी बस्तीमा पसेको स्थानीयले बताएको इलाका प्रहरी कार्यालय त्रिभुवनबस्ती कञ्चनपुरका इन्चार्ज प्रहरी निरीक्षक नरेशराज मल्लले जानकारी दिए । दोदा नदी, मोहना, खुट्टीया, कान्द्रा, चौधर, स्यालीलगायत साना नदी तथा खोलाहरूमा बाढी आएको छ ।