अछामको पहिरोमा परी १७ जनाको मृत्यु, ६ जना अझै बेपत्ता

१ असोज अछाम । अविरल वर्षसँगै अछामका विभिन्न ४ ठाउँमा पहिरो जाँदा १७ जनाको मृत्यु भएको छ । अहिलेसम्म ६ जना बेपत्ता रहेको स्थानीय प्रशासनले जनाएको छ । अछामका निमित्त प्रमुख जिल्ला अधिकारी दिपेश रिजालका अनुसार तुर्माखाद गाउँपालिका वडा नम्बर– ५ नाडामा ४ जनाको शव फेला परेको छ भने ५ जना अझै बेपत्ता रहेका छन् ।

त्यस्तै ढकारी गाउँपालिका वडा नम्बर–६ ढुंगाचाल्नामा १ जनाको शव फेला परेको छ । १ जना अझै बेपत्ता रहेको र ५ जना घाइते भएको उनले बताए । कमलबजार नगरपालिका वडा नम्बर ८ डुंगालामा ५ को शव फेला परेको र १ जना घाइते भएको उनले भनाइ छ ।

कमलबजार नगरपालिकाकै वडा नम्बर ६ हातीबाँझमा मा ७ जनाको मृत्यु भएको छ भने ७ जना घाइते रहेको रिजालले बताए । तीन दिनदेखिको निरन्तर वर्षाका कारण अछाममा बिजुली, सडक अवरुद्ध भएको छ भने जनजीवन अस्तव्यस्त रहेको छ । घाइतेको थप उपचारका लागि हेलिकप्टरमार्फत उद्वार भइरहेको छ ।