संसदमा शीर्ष तीन नेताको दोहोरी, परमादेश बन्यो मूख्य विषय

 

१ असोज, काठमाडौं । सरकारले संसद अधिवेशन अन्त्य गर्न राष्ट्रपति समक्ष सिफारिस गरेपछि शनिबार अन्तिम बैठकका रुपमा ठाकिएको प्रतिनिधिसभा बैठकमा तीन दलका शीर्ष तीन नेताले परमादेशका विषयमा राम्रैसँग दोहोरी खेलेका छन् ।

प्रतिनिधिसभामा अन्तिम सम्बोधनका लागि संसद भवन छिरेका प्रधानमन्त्री शेरबहादुर देउवा, नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल‘प्रचण्ड’ले दोहोरी खेलेका हुन् । उदेवा र दाहालले संसद विघटन प्रतिगनकारी कदम भएको बताएका थिए भने ओलीले संसद विघटन प्रतिगामी कदम नभएर परमादेशबाट सरकार बन्नु गलत भएको बताए ।

बैठकलाई सम्बोधन गर्दै प्रधानमन्त्री शेरबहादुर देउवाले परमादेशको सरकार भन्ने नेकपा एमालेका अध्यक्ष केपी शर्मा ओलीलाई परमादेशकै कारण सँगै बसेर कम गर्ने मौका पाएको जवाफ दिए । देउवाले परमादेशकै कारण संसद बचाउन सकेको र सँगै बसेर काम गर्न पाएको टिप्पणी गरे । दुई पटक प्रतिनिधिसभा विघटन गरेका निवर्तमान प्रधानमन्त्री ओलीले अहिलेको सरकारलाई परमादेशको सरकार भन्दै आइरहेका थिए ।

देउवाले भने, ‘हुनत हाम्रो प्रतिपक्षी दलको नेताले परमादेशको सरकार भन्नुहुन्छ, यो संसद नै परमादेशबाट आएको हो, जहाँ उहाँ र हामी सँगै काम गर्न पाइरहेका छौं । परमादेश नभएको भए उहाँ र हामी सँगसँगै काम गर्न नै पाउँदैनथ्यौं, धेरै ठूलाठूला विधेयकहरु पास गर्न नै पाउँदैनथ्यौं ।’ प्रधानमन्त्री देउवाले परमादेशकै कारण भेट गर्ने मौका पाएको टिप्पणी गरे । ‘त्यसकारण परमादेशले हामीलाई भेट गर्ने मौका दियो । यसका लागि न्यायालयले न्याय गरेको मैले महसुस गरेको छु ।’

यस्तै नेकपा माओवादी केन्द्रका अध्यक्ष एवं पूर्वप्रधानमन्त्री प्रचण्डले एमाले अध्यक्ष केपी ओलीको प्रतिनिधिसभा विघटनको निर्णय प्रतिगामी भएको बताए । उनले एमाले अध्यक्ष ओलीले संसद् विघटनको बचाउ गरिरहँदा दाहालले यस्तो प्रतिक्रिया दिएका थिए । ओलीले पार्टीको आन्तरिक विवादलाई समाधान गर्नुको सट्टा सार्वभौम अधिकार सम्पन्न सदन विघटन गर्ने निर्णय प्रतिगामी भएको उनको भनाई थियो ।

प्रचण्डले भने, ’प्रमुख प्रतिपक्षी दलका नेताले प्रतिगमन र लोकतन्त्रको व्याख्या गर्नुभयो । मलाई अलि अनौठो लाग्यो । जसले जे भने पनि हुने रहेछ कि क्या हो भन्ने लाग्यो मलाई । संविधानमा हुँदै नभएको अधिकार सदनभित्रबाट अर्को सरकार बन्ने सम्भावना भएसम्म सदन विघटन गर्न पाइँदैन सचेत रूपले संविधानमा व्यवस्था गरेको होइन ? अनि सरकार बनाउने अर्को सम्भावना हुँदाहुँदै कि गरियो ।’

बैठकलाई सम्बोधन गर्दै एमालेका अध्यक्ष ओलीले सर्वोच्च अदालतको परमादेशबाट प्रतिनिधिसभा पुनःस्थापनालाई असंवैधानिक कदमको संज्ञा दिए । ओलीले वर्तमान सरकारको पालामा भ्रष्टाचारसमेत बढेको बताए । आफ्नो सरकारले गत वर्ष वैशाख १७ र २७ गते चुनाव घोषणा गर्नु प्रतिगमन नभएको पनि उनले दोहोर्याए ।

ओलीले,’गत वर्ष वैशाख १७ र २७ गते चुनाव गर्दा प्रतिगमन कहाँ आउँथ्यो । निर्वाचनमा जानुलाई प्रतिगमन भनिँदैन । परमादेशबाट असंवैधानिक तरिकाले सरकार गठन गरिनुचाहिँ प्रतिगमन हो ।’ देउवाको प्रशंगलाई कोट्याउँदै ओलीले भने, ’आज छुट्टिने बेलामा के कठोर बोली बोल्नु छ र ? प्रधानमन्त्रीले यस्सो कुरा उठाउनु भएको भएर मात्र बाटो बिराउला कि भनेर त्यसलाई सही बाटोमा लैजान मात्र भनेको हुँ । बाहिरबाहिर एकथोक भनिने र भित्रभित्र अर्कोथोक गरिने अपेक्षा गरेका हुँदैन जेहोस् सम्माननीय प्रमले यसो कुरा उप्काउनु भएको हुनाले मात्र यो कुरा भनेको हुँ ।’

प्रतिनिधिसभाको कार्यकाल असोज आज शनिबारबाट सकिँदै छ । शुक्रबार बिहान बसेको मन्त्रिपरिषद् बैठकले प्रतिनिधिसभाको यो अधिवेशन असोज १ गते मध्यराति १२ बजेबाट अन्त्य गर्न राष्ट्रपतिसमक्ष सिफारिस गरिसकेको छ । ओलीले ४ मंसिरको निर्वाचनका लागि निर्वाचन आयोगले स्वतन्त्र र निष्पक्ष भूमिका खेल्नुपर्ने पनि बताए । उनले निर्वाचन आयोग सरकारका अगाडि लतारिन नहुने बताए ।