प्रधानन्यायाधीश जबरालाई अघोषित नजरबन्दमा राखिएको हैन, सुरक्षा दिएको होः नेपाल प्रहरी

२ असोज, काठमाडौं ।  नेपाल प्रहरीले प्रधानन्यायाधीश चोलेन्द्रशमशेर जबरालाई अघोषित नजरबन्दमा नराखिएको बताएको छ ।जबरामाथि हुनसक्ने सुरक्षा संवेदनशीलतालाई ध्यानमा राखेर थप सुरक्षाको प्रबन्ध गरिएको प्रहरीको भनाई छ । उनको सुरक्षामा खतरा आउनसक्ने अवस्थालाई ध्यान दिएर मात्रै सुरक्षाकर्मीको संख्या बढाएको प्रहरीको भनाई छ ।

प्रहरी प्रधान कार्यालयका निमित्त प्रहरी प्रवक्ता एसएसपी दानबहादुर कार्कीले प्रधानन्यायाधीश जबरालाई निवासबाट निस्कन नदिइएको विषय सत्य नभएको भन्दै अघोषित नजरबन्द गर्न कतैबाट पनि निर्देशन नआएको बताए । आइतबार सञ्चारकर्मीहरुलाई यसबारे प्रतिक्रिया दिँदै एसएसपी कार्कीले सुरक्षाको विषयले मात्र प्रधानन्यायाधीशको निवासमा प्रहरी राखिएको दावी गरे ।

उनले सुरक्षाका कुनै विषय नउठोस् भनेर अन्य दिनभन्दा केही बढी सुरक्षाकर्मी परिचालन गरिएको र सुरक्षाको विषयबाहेक प्रधानन्यायाधीशको निवासमा अन्य उदेश्यले प्रहरी नराखिएको बताए । कार्कीले भने,‘निवासबाट सामान्यजस्तै अन्यत्र जान रोकिएको छैन् । अन्य दिनभन्दा बढी उपस्थित भएकाले रोकेको भन्ने बुझाई मात्र भएको हो । सुरक्षाको विषयमा केन्द्रीत भएर प्रहरी राखिएको हो अन्यथा केही होइन ।’

सरकारले प्रधानन्यायाधीश जबरालाई निवास बाहिर निस्कन रोकेपछि मानव अधिकार आयोगले सर्वोच्च अदालत र जबराको निवास बालुवाटारमा आफ्ना प्रतिनिधि पठाएको छ । सहसचिव तथा प्रवक्ता टीकाराम पोखरेलको नेतृत्वमा टोली पठाएको आयोग सदस्य लिली थापाले जानकारी दिएकी छन् ।

महाभियोग सिफारिस समितिले जबरालाई महाभियोग लगाउन योग्य रहेको प्रतिवेदन शनिबार संसद्लाई बुझाएको थियो । त्यसपछि जबराले आफूमाथि महाभियोग लगाउने संसद नै कामय नरहेको अवस्थामा पदमा फर्किनका लागि योग्य भएको भन्दै आइतबार सर्वोच्च छिर्ने तयारी गरेका थिए । तर सरकारले उनी अहिलेसम्म पनि निलम्बित अवस्थामा नै रहेको भन्दै सुरक्षा निकायलाई जबरालाई सर्वोच्च छिर्न रोक लगाउन निर्देशन दिएको थियो ।