नागरिकता विधेयकको प्रमाणीकरण रोक्न सर्वोच्चमा दर्ता भएको रिट पेशी चढेसँगै स्थगित

४ असोज, काठमाडौं । राष्ट्रपति विद्यादेवी भण्डारीले नागरिकता विधेयक प्रमाणीकरण गर्नुपर्ने अन्तिम दिनमा आएर प्रमाणीकरण रोक्न माग गरिएको रिट सर्वोच्च अदालतको एकल इजलासमा पेशी चढेर पनि स्थगितमा परेको छ । । वरिष्ठ अधिवक्ताद्वय डा. सुरेन्द्र भण्डारी र रमेश बडालले गत बिहीबार नै दर्ता गरेको निवेदन आज(मंगलबार) एकल इजलासको पेशीमा राखिएको थियो ।

सवोच्च प्रशासनका अनुसार निवेदनमा राष्ट्रपति कार्यालय, शितल निवास लगायतलाई विपक्षी बनाइएको थियो । निवेदनमा नागरिकता विधेयक मुलुक र जनताको हितमा नरहेको जिकिर गर्दै विधेयक प्रमाणीकरण नगर्न आदेशको जारी गर्नुपर्ने माग राखेर दर्ता गरिएको थियो । तर, यसलाई हेर्न नमिल्ने कारण देखाएर स्थगित गरिएको छ ।

सर्वोच्च अदालतका न्यायाधीश डा. मनोज शर्माको एकल इजलासमा परेको रिट हेर्न नमिल्नुको कारण रिट निवेदनमा वरिष्ठ अधिवक्ता रमेश बडालको समेत संलग्नता रहेको भनिएको छ । बडाल र डा. शर्माले यसअघि एउटै ल फर्ममा काम गरेका कारण न्यायाधीश शर्माले मुद्दा हेर्न नमिल्ने अवस्था आएको बताइएको छ ।

मंगलबार स्थगित भएको निवेदन भोली बुधबारका लागि पेशी तोकिएको छ । निवेदनमा राष्ट्रपति कार्यालय सहित प्रतिनिधि सभा, राष्ट्रिय सभा, प्रधानमन्त्री तथा मन्त्रीपरिषदको कार्यालय र गृहमन्त्रीलाई विपक्षी बनाइएको छ । भण्डारीले संघीय संसदबाट नागरिकता विधेयक दोस्रोपटक पारित भएलगत्तै सर्वोच्च अदालतमा रिट निवेदन दिएपनि कामु मुख्य रजिष्ट्रार नारायण पन्थीले निवेदन दर्ता हुन नसक्ने भनी दरपीठ आदेश गरे ।

सवोच्च प्रशासन निकट कर्मचारीका अनुसार कानून अनुसार पेश नभएको, अदालतमा आउन परिपक्व नभएको वा क्षेत्राधिकार नभएको निवेदन पेश भएमा अदालतमा प्रशासनिक स्तरबाट दरपीठको आदेश गर्ने प्रचलन छ । उक्त समयमा तीनमध्ये एक कारण देखाएर पन्थीले दरपीठको आदेश गरेका थिए ।

भण्डारीले भदौ २३ गते दरपीठ आदेशविरुद्ध फेरि सर्वोच्च अदालतमा निवेदन दिएका थिए । दरपीठको आदेश चित्त नबुझेर निवेदन दिएका कारण सर्वोच्च अदालतले भण्डारीको रिटलाई एकल इजलासमा सुनुवाइका पेशीमा राखेको थियो । भण्डारीले पेश गरेको दरपीठ विरुद्धको आदेश न्यायाधीश हरिकृष्ण कार्कीको एकल इजलासले सुनुवाई गरेको थियो ।

उक्त इजलासले २८ भदौ २०७९ मा रिट निवेदन दर्ता गर्न आदेश दिएपछि त्यही आदेश अनुसार अधिवक्ता भण्डारीले फेरी ३० भदौमा निवेदन दर्ता गरेको नेपालबहसलाई जानकारी दिए । यो रिटको सुनुवाइ भोली हुनेछ भने राष्ट्रपति नागरिकता विधेयक प्रमाणीकरण गर्नुपर्ने समय आज सकिँदैछ ।