साँझ पाँच बजेसम्म पनि नागरिकता विधेयक प्रमाणीकरण भएन, राष्ट्रपति भण्डारी छलफलमै व्यस्त

४ असोज, काठमाडौं ।  राष्ट्रपति विद्यादेवी भण्डारीले कार्यलय समय सकिँदाासम्म नागरिकता विधेयक प्रमाणीकरण गरेकी छैनन् । उनले दिउँसोदेखि नै विभिन्न क्षेत्रका व्यक्तिहरुलाई शीतलनिवासमै बोलाएर छलफल गरिरहेको राष्ट्रपति कार्यलयका प्रबक्ता सागर आचार्यले नेपालबहसलाई जनकारी दिएका छन् ।

राष्ट्रपति कार्यलयका अनुसार नागरिकता विधेयकलाई लिएर राष्ट्रपति भण्डारीले विभिन्न व्यक्तिहरूसँग छलफल गरिरहेकी छन् । आज साँझ पनि परामर्शका लागि उनले विभिन्न क्षेत्रका विज्ञहरुलाई बोलाएकी छन् ।

संघीय संसद्ले दोस्रोपटक पारित गरेर पठाएको नेपाल नागरकिता (पहिलो संशोधन) ऐन, २०७९ लाई संवैधानिक व्यवस्थाअनुसार प्रमाणीकरण गर्नैपर्ने सीमा पुगेको दिन राष्ट्रपति भने छलफलमै व्यस्त रहेकी छन् ।

नागरिकता विधेयक भदौ २० गते राष्ट्रपति कार्यालय प्रमाणीकरणका लागि पुगेको थियो । आचार्यले मंगलबार उक्त विधेयक राष्ट्रपति कार्यालयमा दर्ता भएको १५ दिन पुग्ने भएकाले राष्ट्रपति भण्डारी छलफलमा रहेको बताए ।

राष्ट्रपतिले यसअघि उक्त विधेयक संसदमा फिर्ता पठाएकी थिइन् । राष्ट्रपतिबाट फिर्ता आएको विधेयक सोही अवस्थामा वा संशोधनसहित संसद्ले प्रमाणीकरणका लागि पठाएको १५ दिनभित्र प्रमाणीकरण गर्नैपर्ने संवैधानिक व्यवस्था छ । उक्त समय आज मध्येरातबाट सकिँदैछ ।