अर्घाखाँचीमा छाडा कुकुर नियन्त्रण गर्न बन्ध्याकरण गरिने

६ असोज, अर्घाखाँची । सदरमुकाम सन्धिखर्क बजार क्षेत्रमा भुस्याहा कुकुरको बिगबिगी भएपछि यसको नियन्त्रण गर्न स्थायी बन्ध्याकरण गरिने भएको छ ।

बजार क्षेत्रमा रहेका भुस्याहा कुकुरका कारण बिहान क्यापस जाने विद्यार्थीसहित बालबालिकासमेत जोखिममा परेपछि सन्धिखर्क नगरपालिका बन्ध्याकरण गर्ने निष्कर्षमा पुगेको हो ।

सन्धिखर्क नगरपालिकाको वडा नं १ र २ सहित वडा नं ७ को फुदवाङ, वडा नं १० को विहार बजारमा रहेका करिब १२० कुकुरलाई बन्ध्याकरण गरिने नगरपालिकाले जनाएको छ । सन्धिखर्कमा बन्ध्याकरण तथा भ्याक्सिनेसन शिविर सञ्चालन गरी दक्ष चिकित्सकहरूबाट कुकुरहरूको बन्ध्याकरण गरिने र यसका लागि बोलपत्र प्रक्रिया अगाडि बढाइसकिएको नगरपालिकाको भनाइ छ ।