देशमा फेरी प्रतिगनकारी शक्तिले टाउको उठाउने कुचेष्टा गर्यो: प्रचण्ड

७ असोज, काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ देशमा फेरी प्रतिगमनकारी शक्तिले टाउको उठाउने कुचेष्टा गरेको भन्दै परिवर्तनकारी पक्षहरुबीचको एकता थप बलियो बनाउन आवश्यक भएको बताएका छन् । उनले सत्ता गठबन्धनमा रहेका दलहरु परिवर्तनका पक्षधर भएकाले उनीहरुबीचको एकताले मात्रै प्रतिगमनकारी शक्तिलाई परास्त गर्न सक्ने बताएका छन् ।

पार्टीनिकट किसान महासंघको भेलालाई सम्बोधन गर्दै प्रचण्डले यस्तो शक्तिबाट संविधान मास्ने प्रयास पटकपटक भइरहेको भन्दै अहिले पनि परिवर्नका पक्षधर र परिवर्तनका विरोधीबीच गहिरो रुपमा संघर्ष चलिरहेको बताए । उनले पछिल्लोपटक टीआरसी विधेयक असफल पार्ने कसरत भइरहेको कुरा नागरिकता विधेयक प्रमाणीकरण नहुनुबाट बुभिएको बताए ।

प्रचण्डले अहिले प्रतिगमन शक्तिहरू सबै एक भएर आफूमाथि निरन्तर प्रहार गरिरहेको बताउँदै माओवादीविरुद्ध सामाजिक सञ्जालमा भ्रम छर्ने काम प्रष्ट देखिरहेको बताए । उनले एकथरि मान्छे माओवादीलाई कम्जोर बनाउन रातदिन धुप हालिरहेको भन्दै जसले परिवर्तनको नेतृत्व गर्यो त्यसैमाथि किन प्रहार भइरहेको भन्ने कुरा आफुलाई बुझ्न कठिन भएको बताए । प्रचण्डले आफुमाथि काल्पनिक र कपोकल्पित आरोप लगाइने गरेको दावी गर्दै भारत भ्रमणमा जाँदासमेत भेट्दै नभेटेका मान्छे भेट्यो यति बुँदे सम्झौता गरियो भनेर लगातार कुप्रचार गरिएको गुनासो गरे ।

उनले भने, ‘कुरा धेरै नै गहिरो छ । गत सालदेखिको प्रतिगमको षड्यन्त्र नयाँनयाँ रूपमा फेरि अगाडि ल्याउने जमर्को भइरहेको छ । हामीले एकता गुमायौं भने कुनै दिनमा प्रतिगमन हुने अझै खतरा छ । संविधानको पालक र संरक्षकबाट जानीबुझी संविधान खुलेआम मिच्ने काम भएको छ । यो सामान्य होइन । हजारौंको बलिदानबाट प्राप्त उपलब्धि खोस्ने र अपहरणको षड्यन्त्र हो । यसलाई रोक्न अरु कसैले सक्दैन । गत साल लाखौंलाई सडकमा ल्याएपछि मात्र त्यो परास्त गर्यौं । अहिले पनि किसान, सुकुम्बासी, जनतालाई अगाडि बढाएर शिक्षित गर्दै आन्दोलित गरेर त्यसलाई परास्त गर्न सकिन्छ ।’

उनले ठूलो सपना बोकेर कम्युनिष्ट पार्टीलाई एकताबद्ध गरेर लगेपनि त्यसलाई बचाउन नसकिएको बताए । देशी–विदेशी प्रतिक्रियावादी शक्तिहरूले वामपन्थीको एकता नचाहेको र भाड्ने षडयन्त्रमात्र गरेको भन्दै अहिले फेरि नयाँ शिराबाट वामपन्थीलाई नजिक ल्याउने दिशामा आफु अगाडी बढीरहेको दावी गरे । उनले प्रतिगनकारीले देशमा चलखेल गर्ने अवसर पाएसम्म परिवर्तन ल्याउन कठिन हुने बताए ।