‘यस्तो बन्नुपर्छ घोषणापत्र’ शीर्षकमा कांग्रेसले माग्यो मतदाताको सुझाव

८  असोज, काठमाडौं ।  नेपाली कांग्रेसले आगामी प्रदेश र प्रतिनिधिसभाको निर्वाचनमा आफ्ना आगामी नीति, कार्यक्रम र रणनीतिसहितका धारणा समेटिएको घोषणापत्र तयारीका क्रममा मतदाताको सुझाव आह्नान गरेको छ ।

घोषणापत्र तयारी समितिले जनभावना संकलन गर्न प्रविधिका विभिन्न माध्यमबाट सुझावका लागि आह्नान गरेको हो । उसले सबै क्षेत्र, बर्ग र समुदायसँग उचित सुझावको अपेक्षा गरेको छ ।

यसका लागि समितिले आन्तरिक छलफलदेखि प्रत्यक्ष सार्वजनिक संवाद लगायतका कार्यक्रम गरिरहेको छ । समितिका प्रवक्ता एवम् कांग्रेस सहमहामन्त्री जीवन परियारका अनुसार ‘यस्तो बन्नुपर्छ कांग्रेसको घोषणा पत्र’ शिर्षकमा मतदाताबाट सुझाव माग गरिएको बताए ।

उनले भने, ‘हामीले सामाजिक सञ्जालका विभिन्न माध्यमबाट सुझावका लागि आव्हान गरेका छौँ । ह्वाट्स एप, भाइबर, इमो लगायत विभिन्न माध्यमबाट हामीलाई घोषणापत्रमा सुझाव पठाउन मिल्छ । हामीले स्वदेश र विदेशमा रहनुहुने नेपाली कांग्रेसका सदस्य, समर्थक, शुभेच्छुक र आलोचक एवं समस्त नेपाली मतदाताहरूबाट सुझावको अपेक्षा गरेका छौँ ।’ विभिन्न माध्यमबाट आएका सुझावहरुलाई समितिले घोषणा तयारीका क्रममा सम्बोधन गर्ने जनाएको छ ।