आजदेखि सर्वोच्च अदालतको कामु प्रधानन्यायाधीशको जिम्मेवारी हरिकृष्ण कार्कीले सम्हाल्दै

११ असोज, काठमाडौं । सर्वोच्च अदालतका कायममुकायम प्रधानन्यायाधीश दीपककुमार कार्की घर विदामा बसेपछि वरिष्ठतम न्यायाधीश हरिकृष्ण कार्कीले आजदेखि कायममुकायम प्रधानन्यायाधीशको जिम्मेवारी सम्हालेका छन् । उमेर हदका कारण अनिवार्य अवकाश हुन लागेका कायममुकायम प्रधानन्यायाधीश दीपककुमार कार्की बिदा बसेसँगै हरिकृष्ण कायममुकायम प्रधानन्यायाधीश बनेका हुन् ।

दीपककुमारकार्की आज (मंगलबार) बाट घर बिदामा बसेका छन् । उनी आगामी १५ असोजपछि ६५ वर्षे उमेर हदका कारण अवकाशमा जाँदै छन् । प्रधानन्यायाधीश चोलन्द्रशमशेर जबरामाथि महाअभियोग लागेर निलम्बनमा परेपछि सर्वोच्च अदालतको नेतृत्व लगातार दोस्रोपटक कायममुकायम प्रधानन्यायाधीशको हातमा आएको छ ।

प्रधानन्यायाधीश जबराविरुद्ध संसदमा गत १ फागुनमा महाभियोग प्रस्ताव दर्ता भएपछि दीपककुमार कार्की कायममुकायम प्रधानन्यायाधीश बनेका थिए । उनी कायममुकायम रहँदै अवकाशमा जाँदै छन् । आगामी २७ मंसिरबाट जबरा पनि ६५ वर्षे उमेर हदका कारण अनिवार्य अवकाशमा जाँदै छन् ।

जबराले अवकास पाएपछि प्रधानन्यायाधीशमा हरिकृष्ण कार्कीको पालो आउने छ । तर, न्यायपरिषदले अहिले नै उनलाई प्रधानन्यायाधीशमा सिफारिस भने गर्ने छैन् । यसका लागि जबराले अवकास पाउनुपर्छ । अनि मात्र कार्कीले प्रधानन्यायाधीश पाउने छन् ।