समानुपातिक तर्फका उम्मेदवारबारे छलफल गर्न देउवाले बोलाए पदाधिकारी बैठक, बालुवाटारमा छलफल जारी

११ असोज, काठमाडौं । प्रधानमन्त्रीसमेत रहेका नेपाली कांग्रेसका सभापति शेरबहादुर देउवाले समानुपातिक तर्फका उम्मेदवारबारे पार्टीमा चर्को विरोध भएपछि यसबारे छलफल गर्न पदाधिकारी बैठक बोलाएका छन् । बैठक अहिले प्रधानमन्त्रीको सरकारी निवास बालुवाटारमा चलिरहेको छ ।

४ मंसिरमा हुने निर्वाचनको समानुपातिक पद्धतितर्फको बन्दसूचीका विषयमा छलफल गर्न देउवाले पदाधिकारी बैठक बोलाएका हुन् ।पदाधिकारी बैठक दिउँसो २ बजेदेखि बसिरहेको छ । कांग्रेसका सहमहामन्त्री बद्री पाण्डेले दिएको जानकारी अनुसार समानुपातिक तर्फको सूचीमा पार्टीको संस्थापनइतरले विरोध जनाएपछि छलफलका लागि पदाधिकारी बैठक बोलाइएको छ ।

असोज ३ मा निर्वाचन आयोगमा बुझाइएको बन्द सूची प्रति नेता डा. शेखर कोइराला पक्षले असन्तुष्टि व्यक्त गरी विरोधमा उत्रेको छ ।आयोगले बिहीबार र शुक्रबार बन्दसूचीमा रहेका नामहरुमा संशोधन गर्न समय दिएको छ । कोइराला समूहले सभापति देउवालाई बन्दसूची सच्याउन दवाव दिइरहेको छ ।